立場新聞 Stand News

水上浮屍藝術品,四十年前希治閣都做過啦

2019/3/22 — 18:51

全民熱烈歡迎 KAWS 嗰隻「Companion」到港!

呢隻叉眼灰白嘅巨型公仔,成 37 米咁長,早排駛過青馬大橋,泊喺船廠已經引起哄動。佢今日仲正式進駐維港,攤屍喺添馬公園對開海面,睇嚟今個周末都唔知幾多人撲出去打卡喇。

打卡當道嘅世界,咁大件嘢,又要有維港做背景,肯定勁吸心心。一大條死屍攤正喺海中心,仲要係香港最 iconic 嘅港口,有幾多人仲會覺得唔老嚟?又唔係農曆七月,咪咁多心啦係唔係?人哋 KAWS 係世界知名嘅藝術家,「Companion」係佢至今最大型的藝術作品,我哋討論返藝術好唔好?

廣告

好,咁我就同你講吓藝術。浮屍呢個玩法早就唔係新嘢,成四十年前已經有人玩過。事發係 1971 年嘅 8 月 26 號,英國倫敦泰晤士河河面,正正就係 Big Ben 前面,有一具面部朝天嘅「浮屍」。「浮屍」身穿黑色西裝同皮鞋,個樣⋯⋯極似希治閣!!!

廣告

唔係被人惡搞,而係希治閣嘅自作業。佢不惜犧牲自己個樣,唔怕大吉利是,整隻假人公仔扮死。咁瞓身演出不過係為咗宣傳新作,作為佢回歸之作——《奪命狂兇》(Frenzy)嘅 trailer 片頭。雖然差不多半個世紀前嘅作品,但睇見都覺得當時嘅希治閣假人嘅手工,唔差得過 KAWS 隻吹氣灰色嘢掛?

話時話,有媒體話「Companion」第一日入港已經漏氣,未來十日都唔知點算。唉,我都係寧願睇多次《奪命狂兇》好過喇。孖你一齊睇喇,條 trailer。

發表意見