人在中環 - CK

人在中環 - CK

我係一隻又笨又固執既豺狼。著有《人在中年》

2019/2/20 - 11:56

佢哋點解會心灰意冷

資料圖片,來源:www_slon_pics @Pixabay

資料圖片,來源:www_slon_pics @Pixabay

出嚟做嘢越耐,同事、下屬 come and go,早已習以為常。好嘅同事要走,往往都留唔住,主要原因係,同事心有不滿嘅時間已經唔短。呢個世界,一唔喜歡就話唔撈嘅人其實並唔多,但當佢哋個心開始萌生走人嘅念頭之時,佢對身處環境嘅觀察期亦告展開。佢哋期望,環境會改變,氣氛會變,還有作為上司嘅「你」,可能都會改變。但最後結果係一切都冇變,觀察嘅工作終於可以收檔,心情嘅狀態由「不滿」演變成「心灰意冷」,離職於是變成無可逆轉。

呢個「心灰意冷」嘅過程,我諗好多人都經歷過。但有時環境的確係會變好,工作氣氛亦的確有機會隨住市況而改變;唯獨是,你嘅上司,如果冇換到人,好少會變好。

離職嘅時候,老細問你點解想走,你總有本事可以吹一堆嘢出嚟去回答呢條問題。但有太多時候,走係因為覺得老細有啲 character 自己接受唔到,又或者佢對下屬嘅有啲 expectation,你覺得係永遠同你 sync 唔到。你覺得老細唔會改,所以你都係慳返啖氣唔講出口了,事關講咗唔會改變到佢,而講出口,還要冒住反檯嘅風險。大部份人眼中,老細個心係玻璃做的,天錯地錯但佢不能錯,你走人係因為頂佢唔順?呢啲說話,唔講得。山水有相逢,他日還希望可以好相見嘛。

廣告

但當你現實一啲去諗,作為老細,你同佢哋點樣相處,其實係同事們工作得開唔開心,佔好大部份嘅一個項目。下屬嗌走,講真點會唔關你份人事?有時你自以為對下屬好好,但言語間所顯露出你嘅一啲價值觀,又或者你暗自對下屬嘅額外要求,聰明嘅同事有本事「聞到陣味」。好多嘢唔係你平日冇講出口,同事們就會 feel 唔到的。呢啲咁嘅細節位,往往先至係最令到同事感到「心灰意冷」嘅原素。當你喺度為每個同事打分數之時,同事們亦在默默地觀察你。佢哋嘅敏銳度,往往比你更勝一籌。

佢哋未必覺得你係衰人,但佢哋會睇到一啲你身上嘅「問題」,而因為呢啲「問題」,佢哋覺得冇辦法同你合作落去。大部份呢啲所謂問題,係一啲人性嘅弱點,有時你自己甚至唔為意自己有呢啲唔妥的。大部份嘅時間,你都「記得」要將問題隱藏、修飾;但聰明嘅同事卻總有能力,察覺你隱藏嘅背後,問題其實仍然存在。你呃得到人,但呃唔到佢。最慘係,你以為自己已經將問題「處理好」,處理到「冇人察覺」,但實情卻係「好多人都仲 feel 得到」。

會唔會有好心人,肯同老細講真相呢?仲做緊嘅唔敢講,辭職嘅人費事講,咁除非老細某日突然開竅,否則問題必然永續,「心灰意冷」嘅故事仍然會一個接一個。

幾勁嘅老細其實都係普通人,冇人提,永遠都唔會知道要改。只係,邊個有膽去做嗰個烈士?就算有膽,又點解「值得」去做?

對上所講嘅,我自己通通都衰過。但願你哋冇份。

 

作者 Facebook