立場新聞 Stand News

林作式宣傳如何操作?

2020/8/6 — 10:49

林作 FB

林作 FB

【文:共享大亨】

從保險業鉅子林作炫耀其4萬蚊 Brioni 西裝引起網民圍剿,到末日博士大戰美國三流大學經濟學副教授,近日坊間「花生文」中聽得最多的名言是:“Don’t make stupid people famous”。

但從一個營商角度,林作看來其實是聰明絕頂,宣傳高手。有一點「別人笑我太瘋癲,我笑別人看不穿」的味道。經過西裝駡戰後,現在大部分香港市民都知道林作唔再係補習天王,已經華麗轉身成「林作保險」。

咁入屋嘅宣傳,完全毋需花一分一毫。一嚟可以 cold sell 吸客,二嚟可以壯大下線,唔駛自已跑數。這總好過我們 WOOM 共享空間預訂平台,每個月買萬萬聲落廣告都冇咁入屋!

而林作亦巧妙操作,透過搞笑道歉和直播去 Brioni 攞西裝(其後被 Brioni 婉拒)等,維持話題熱度,榨盡該「爆 seed 事件」的剩餘價值。

這種宣傳手法其實並非新發明,中外的宣傳策略亦常見。對初創和中小企業,筆者極力推薦「Traction: How Any Startup Can Achieve Explosive Customer Growth」一書,當中除了介紹這種嘩眾取寵的宣傳手法外,亦介紹多種意想不到的吸客手法,令小第在開展事業上得益不少。

林作利用這種「靠出位」的宣傳手法,好處是完全唔駛錢,就能引起大眾注意,本小利大。在香港最常見的公式就是用「炫耀」的方法,再加啲 juicy 嘅 noise。

近年來係香港玩得低手嘅有「小賭怡情,大賭變李嘉誠」的「金毛誠哥」,露骨數銀紙賣賭波貼士,同埋佢老友推銷加密貨幣挖礦機嘅「幣少爺」,揸架林寶周街派錢。這兩位大哥之所以是低手,只因老正味濃到洗唔甩,同微信玩倫敦金的「才俊」同出一轍。

至於「中階版」就係:曾經窮得剩低一部電話,但依家啲廣告愈嚟愈誇嘅 Brian 車。雖然佢入屋入到好多人見到佢塊尊容都想 skip,但佢始終要靠自己銀包大灑金錢賣廣告,個 growth 唔夠 organic。始終用呢種「靠出位」宣傳策略的美妙之處就在借力,免費宣傳。

除左炫耀奢侈品如「數銀紙」,租間豪宅拍 live,或者揸番架超跑,跟住煽情地帶出個「把握呢個機會,改變你一生」的 tag line 之外,另一種方法就係做一啲荼餘飯後的話題,健康的如當年譚小環「港姐貼地賣魚蛋」,生鬼的如跟明星引發吓緋聞,或最近金融才俊「的士大合奏」等。

先作風險聲明,呢種「靠出位」的宣傳手法好似西裝一樣,唔係個個人都 carry 到。簡單而言,要玩得成功,你個人本身要「likeable」人緣好,而呢樣係天生嘅。賭王四房共處,大家佩服其風趣幽默,風流倜儻,盡享齊人之福。但鄧兆尊同樣為二人限聚令而愁,但公眾形象則截然不同,取笑成份較多。從政者 Boris Johnson 同 Donald Trump亦常口不擇言,私生活紊亂,但大眾仍然一笑置之,較容易接受其過失。林作看起來亦近於此類。當然其姓格經常給人牙察察的型象,亦像明星般很在意大眾的關注。但大家會覺得他屬於真性情,而非刻意矯作宣傳。而如果你有幸擁有呢種「likeable」嘅特質,天生你就可以去從政,橫掂依家立法會選舉延期了一年。 

而這種宣傳策略的另一關鍵,就是由「attention」轉作生意的「conversion」。當你透過炫耀等方法營造業界翹楚,成功人士的形象後,就要利用這些關注推銷產品,營造需求,或逐漸營造一個專業的形象。令大眾覺得你「成功」係因為「有料」,所以「吋得起」。高手的就是建立一個個人品牌,令大眾覺得一想起保險(或其他產品),你就係龍頭,在此領域有過人之處。其實林作兄亦有向這方面著工夫。 近來林生的 post 除左炫耀其團隊規模,保費收入排名外,亦有真實客戶如何受恵於危疾保險的案例分享。

但用這個方法宣傳要注意的是,唔好玩得太過火,引人注意之後盡量調較番去個專業形象,攞啱個平衡。如搵林生買保險,理想係個客會覺得呢個後生仔有啲吋嘴曬命,但做事認真拼搏,而唔係搵佢買變成一件柒事會俾人笑,咁就前功盡廢。故筆者認為林生嘲笑同行作「保險狗」就有點美中不足,過了火。

最後,想跳出香港,介紹用盡呢招看風駛𢃇,攞盡個人利益的神級人物。第一個大家都會想到,就是維珍航空創辦人 Richard Branson。他用「自已」來行銷,跳傘探險創世界紀錄,活出公司品牌。第二個更神級的就是同林作一樣著 Brioni 西裝的侵侵特朗普。但諷刺是 Donald Trump 並非以西裝品味見稱,眾所周知佢常用膠紙把領呔的前後兩邊黏住,以防飄來飄去,常被大眾嘲笑。

侵侵花邊新聞厚過一本書。女伴貨如輪轉,舉辦環球小姐,常口不擇言引起罵戰,吋盡政商界。但其鮮明的形象,花邊新聞的報導正正為 90 年代其蝕到入肉的大西洋城賭場宣傳。大家亦可能聽過討厭坐長程機的侵侵,在事業最倒楣時親臨香港搵本地大孖沙打 golf 交心,遊說賣樓撲水。但蝕到一屁股債後,在二千年初籍著有 2000 萬收視的真人騷「The Apprentice」,集集狂 loop「you are fired」,鞏固其「成功商人」的形象。

Donald Trump 很多冠名的物業都不是他擁有。他利用自己的個人品牌,建立「成功,豪華,品味」的形象,收 franchise 和管理費賺錢。他甚至用自己 Trump 的品牌出樽裝水,甚至西裝品牌(由林作品評會相當有趣)。自我宣傳至極緻,最終把自己推上總統保座。面對任何質疑,佢都可撻番句自己係成功商人,有「proven track record」解圍,事事抵賴對手淨係識吹,根本未有成功營商經驗。即使他未曾繳納任何稅項,唔提供稅務紀錄,佢都可以演譯為成功商業策略的一部份。冇人知道他的資產有否其吹噓這麼多,但 Trump 已經成為成功的標籤,玩這個遊戲已經玩至神級!

其實炫耀晒命出位,甚至係膚淺都冇問題(你的受眾係普羅市民嘛)。最緊要係 conversion,將個人形象轉化成銷售賺錢。做生意嘅,落到袋理得人點睇?笑你嘅,大部份到時都係你的財富金字塔下層😎

(作者簡介:共享空間預訂平台行政總裁,專研初創的數碼行銷宣傳策略,創業技巧,取得融資秘訣。博客 / Facebook

廣告
廣告

發表意見