立場新聞 Stand News

如果香港「精英」響冰島…

2018/6/19 — 12:39

冰島首都 Reykjavik l 資料圖片 l Dany Sternfeld @ flickr — Attribution-NonCommercial-NoDerivs 2.0 Generic (CC BY-NC-ND 2.0)

冰島首都 Reykjavik l 資料圖片 l Dany Sternfeld @ flickr — Attribution-NonCommercial-NoDerivs 2.0 Generic (CC BY-NC-ND 2.0)

如果香港「精英」響冰島…

由於冰島晉身世界盃,冰島一時間成為網上熱話。雖然筆者是 80 後年輕人,本應是沒有國際視野、閉關自守、井底之蛙,但咁啱我近年尚算稍有追開冰島政治發展,也來貢獻一下我的小小冷知識,談談冰島人如何對待他們的政經精英。

冰島近年最觸動國際傳媒注意的,當然就是金融海嘯引發的經濟危機。講起金融海嘯和歐洲,很多人都會想起希臘等國,人民懶散唔做嘢又貪福利,令財赤和國債爆煲,但冰島不是這樣。冰島在 2000 年代初開始積極發展金融業,想靠玩財技發大達,但當 2008 年美國華爾街爆大鑊,冰島金融業亦受波及,數間玩財技玩大咗的銀行周轉不到面臨破產,要政府用公帑打救。

廣告

不過更令人側目的是,冰島人竟然膽敢追殺這班金融才俊,指責他們自私自利累街坊,政府成立特別機關調查事件有無涉及犯罪,結果多位 ibanker 被告欺詐和判監。據網上不完全統計,至少有 36 位冰島 ibanker 被判監,合計刑期達 96 年。冰島是全球唯一一個在金融海嘯後將 ibanker 判監的國家,行為獲多間國際傳媒(主要是左翼的)激讚和景仰,是全球最具問責精神國家。講到依度,應該全香港金融才俊都膽戰心驚,原來玩財技玩出火,可以搞到要坐監的。

儘管金融業玩 L 完,金融才俊坐哂監,冰島經濟沒有玩完。在環球經濟復甦,特別是旅遊和科技業帶動下,冰島 GDP 在 2009 和 2010 年累跌 10% 後已迅速恢復,冰島現時 GDP(2017 年)已較危機前(2007 年)高出 2 至 3 成(視乎統計方法)。嘩,唔靠金融地產,又冇石油,又冇得背靠祖國大灣區機遇,點解 GDP 可以咁升法㗎?好神奇呀!

廣告

經濟精英做哂監躉,政治精英又如何呢?時任總理 Geir Haarde 在民意壓力下宣布辭職和提早大選,他期後更被特別機關控告失職和公職人員行為失當,不過成功脫罪。雖然告唔入,但單係政府高官可以因為無能而被控告,都算轟動武林驚動萬教,響香港根本無法想像。

接任總理的 Jóhanna Sigurðardóttir 成為全球第一位同性戀者民選領袖(first openly homosexual head of government)。同性戀者做到領導人,國家仲唔係禮崩樂壞?依一點又係應該嚇到香港建制派立即上帝同觀音一齊跪拜定驚。

由於救市措施惡啃,這位新總理的民望也徐徐下跌,2013 年選舉後總理又換人,由一位反對救市措施和主張追殺銀行的 Sigmundur Davíð Gunnlaugsson 出任。但他原來講一套做一套,2016 年的巴拿馬文件揭發他也曾藉離岸公司玩財技(及受惠於救市措施),但在做議員利益申報前夕將公司轉給老婆,結果唔洗申報。雖然開離岸公司不犯法,嚴格來說他也沒違反申報要求,而且他都已經推哂比老婆了,但他仍然要宣布辭職。

所以呢,響冰島,賴話啲利益係上任前的所以唔洗申報係冇用㗎,一樣要你下台㗎。仲有開離岸公司都係可以搞到高官下台㗎。如果比人知仲係拎嚟經營劏房,隨時比人當街亂棍毆死。

到 2017 年,冰島總理又換人了,又係因為總理有醜聞。今次有醜聞的時任總理 Bjarni Benediktsson,又係嚴格嚟講冇犯法甚至根本唔係佢有事,係佢阿爸幫個孌童癖性罪犯寫求情信,但公眾怒吼「你老豆吖!」咁就搞到佢下台了。

所以響冰島,你家人有錯,等於你都有錯。用依個邏輯,你老婆同個女響機場搞事等於你搞事,你老婆的家人囤地同開劏房等於你囤地同開劏房,你個工程師老公僭建等於你僭建……你叫班精英點生存呀。

跟住接做總理的人呢,又係會嚇到班精英移民的。現任冰島總理 Katrín Jakobsdóttir 42 歲,是 70 後,而且來自綠黨,係個環保人士!搵個後生環保人士做領袖,我斷估冇辛苦,一定搞到冰島冇哂發展、冇哂國際視野、政府停頓、經濟崩潰云云。大家睇住嚟啦。


原刊於作者網誌

發表意見