立場新聞 Stand News

【一分鐘化學】銀離子殺毒?

2020/2/10 — 21:07

資料圖片,來源:George Hodan @ Public Domain Pictures

資料圖片,來源:George Hodan @ Public Domain Pictures

1. 【病毒同細菌係唔同嘅嘢!】病毒(virus)喺外界係「冇生命」,入咗人體内先可以繁殖。細菌喺外界「有生命」,可以自行繁殖。我成日講「消滅」病毒,「殺死」細菌,因為病毒喺外界係冇生命,你唔能夠「殺死」佢,只能夠「消滅」佢。

2. 【銀離子同其他重金屬及其離子其實有毒,係可以殺死「細菌」嘅】但係消滅「病毒」就未有太多文獻資料。而食咗「銀」產品,就可以「預防病毒」?分分鐘濃度高到自己中毒死咗,都未完全消滅病毒。到今日為止只係發現到銀嘅納米粒子,有可能對抗到病毒,但係詳細都未證實。

3. 【大部分重金屬都係有毒嘅,所以歷史上有好多殺菌嘅例子】

廣告
  1. 銀(Ag):古代嘅時候人類發現啲水擺咗一舊銀落去,係冇咁容易生青苔嘅。從而發現到銀離子(Ag+)係可以消滅部分細菌微生物。今日都有除臭止汗噴霧用銀離子殺死令汗變臭嘅菌。
  2. 銅(Cu):古代發現銅嘅礦物「孔雀石」係可以用嚟「殺精」嘅,(我唔知點放入陰道内喎 ?)。人類第一次成功用「子宮環避孕」就係用屈曲嘅銅線,放入生殖器內(自己咪試,會死人㗎!),佢放出嚟嘅銅離子(Cu2+),可消滅精子。
  3. 銅(Cu)、鎳(Ni):你去茶餐廳成日見到一碗水喺個水吧,侍應寫咗嗰張單,點啲水,黐張單係枱面,啲風就唔會吹走張單。以前我喺茶餐廳做嘅時候,知道呢碗水係擺咗幾個毫子,令到嗰啲水係唔會變臭。就係 Cu2+ 同 Ni2+ 殺咗水內細菌。
  4. 鉑(Pt,一種白金):以前有人做「古怪實驗」電解「大腸桿菌」嘅時候,發現咗大腸桿菌只能夠一路生長,而不能分裂繁殖。之後知道 Pt 電極氧化同電解質生成抗癌藥 cisplatin。原來佢可以黐住細菌嘅 DNA,令到 DNA 不能複製,亦用呢個原理去殺死癌細胞。

4. 【既然有毒,大家唔好矇查查乜都唔知就攞嚟用】分分鐘自己中咗毒都唔知,如果你問我嗰啲銀噴劑/銀口罩/銅口罩可唔可以消滅到呢隻新冠狀病毒,我會話:「咪傻啦,未有證據我點解會信?」不如去廟求條符護體可能掂啲!

 

廣告

作者 Facebook

發表意見