立場新聞 Stand News

想 60 歲退休要儲幾多錢?

2019/1/7 — 12:27

資料圖片,來源:QuinceMedia @Pixabay

資料圖片,來源:QuinceMedia @Pixabay

正所謂大話怕計數,今次想計一下,如果要 60 歲退休兼且生活質素唔好下降太多,要儲幾多錢?

22 歲大學畢業做到 60,健健康康活到 90,這代表什麼?就是用 38 年打工嘅時間,儲蓄足夠嘅錢,作為往後 30 年的生活費,其實唔使點計都知係好大鑊!

用情境分析(scenario analysis)會更實在:假設 22 歲大學畢業馬上搵到工、仲有得升職,所以加薪速度跑贏通脹(每年 7% vs 2%)、而且 ok 節儉,交稅後仍然儲到稅前人工的 30%。但買唔起樓,做到 60 歲,跟住退休活到 90 歲。結果係點?

廣告

先假設投資回報(升值 + 利息/股息)4%(比 2% 通脹高 2%),粗略計算,你退休前使開一千元(包括交稅),退休後只能使四百六十元,才夠錢活到 90。實際情況會更壞:(1) 租金好難減咁多,唯有在其他生活費縮皮,(2) 照顧上一代的負擔好難控制,(3) 越近 80 歲,條數就會越難計:醫療費用無得估、不敢冒投資風險以致難以跑贏通脹、仲要萬一長命百歲……!

只用一個情境睇問題唔夠立體,要配合敏感度分析(sensitivity analysis)。文章末表列了「投資回報」和「儲蓄率」這兩大因數,對退休預算的敏感度。有幾點個人意見分享:

廣告

一、投資回報的假設,對退休預算極其敏感。樂觀的人認為可以跑贏通脹,所以儲蓄不需太多。這想法非常危險,尤其是有些財演講到投資回報 10% 無難度,若真有此能耐,會唔會偉大到同你分享呢?保守假設是追和通脹;如果你覺得可以跑贏通脹 2%,我會恭喜;如果你認為可以跑贏通脹 4%,唯有把我當年老闆講過嘅金句轉贈給你:「目標定在天上,但千祈唔好踩到地上嘅屎」!請不要混淆:財演好多時講嘅係「某年」「某項投資」的「目標」回報,而退休預算講嘅係「22-90 歲平均每年」「全副身家」的「必要」回報!

二、過往幾十年,買樓令好多人安享晚年,因為樓價銀碼大、可用高槓桿、而且樓價跑贏通脹。但今時唔同往日:(1) 根本買不起樓;(2) 就算買得起樓,樓價也難以繼續跑贏通脹,因為現時樓價已高到社會難以接受,若往後幾十年樓價繼續跑贏通脹,香港將無法維持社會穩定。

三、即使買不起樓也不能放棄,否則老了沒錢,真係好大件事!之前貼文已經提過,要盡早儲蓄、要「終身學習」投資、要鍛鍊堅韌的投資心理質素、要懂風險管理。從下表看到,即使能跑贏通脹 2%,儲蓄率目標都應定在 40% 或以上,才不致退休後生活變化太大。

四、殘酷的現實是,有很多人無論怎樣節儉都不可能做到理想的儲蓄率,有些人根本入不敷支。對於這些人,現時的社會保障安排遠遠不足,希望政府能為這些需要幫助的人制定合理和全面的政策。

五、最後,退休問題的本質就是長壽問題,唯一的解決方法就是延長退休年齡,以香港人口老化的速度看,問題已很嚴峻,希望政府能積極推動各大小企業,盡快延長退休年齡。

作者製表

作者製表

 

原刊於貼地風管 Facebook

發表意見