立場新聞 Stand News

【睇片】隔離太久,意大利人放假狗

2020/4/9 — 17:43

人一藍就腦殘,人一悶就會點?

唔好以為後生細仔先鍾意四圍 wet,唔慣在家避疫的日子。咩年紀都好,都有怕悶的人。無得去街,平日一班人耍開太極都無得耍,只得在家練下八段錦。香港地都還好,四個人以上先唔聚得,外國好多地方兩個人就非法集結,甚至有地方話要男人女人分單雙數日子出行。真係禁足令都千奇百趣。

禁還禁,天生不羈的人類想出街,呼吸自由空氣的欲望,唔會因為武肺就消失。正所謂,你越係唔俾佢做,佢就越想做,教過仔女你一定明。之但係,而家係一個政府管國民,國民想出街街,又唔想犯法,創意爆燈的人類唯有各出奇謀。

廣告

唔知你知唔知,疫情曾經好嚴重的意大利,居家令有一大缺口,就係「放狗」!放狗,唔係暗號,真係你有隻狗就可以大條道理話:「阿Sir,人唔放風都要放狗」。真係講你都唔信。歐洲雖然都多人養狗,但狗都唔係人人有 。你知道放狗可以出門口,但你又無狗,可以點?

意大利人話,我就係「放假狗」!網上極多片,睇到我眼都突!大媽大叔一手拉住一球毛狀物體在街上橋上走過。以我有限的生知識來判斷,毛狀物體應該四肢發育不太健全,基本上無郁動能力的。你拉就行,你唔拉就唔行,非常聽話。行兩行,就仆低,要你出手扶起身。十足我細個的玩具,那些拉住走的假老鼠仔,童年回憶返曬來。誰不知,意大利人咁大膽,公然「放假狗」。

廣告

好似話唔只意大制,西班牙人為了出門,換上狗仔裝,直接四條腿走路。奇聞!一百歲唔死都仲有新聞!

起初,我都唔信。你知,網上好多惡搞片,我又意外地好騙。誰不知,老友報料,話近日歐洲有新聞報意大利倫巴第有市長「譴責」市民「放假狗」的行為。唔到叔叔我話唔信就唔信——人一悶起上來,真係咩都做得出。

露台唱歌到今日「放假狗」,意大利人的創意從來無令我失望過,I like it!!

發表意見