立場新聞 Stand News

致 17 歲的我

2020/8/13 — 9:34

圖片來源:Jordan Whitfield @unplash

圖片來源:Jordan Whitfield @unplash

Dear Miss Yu,

Hi~ 我係 Ms Yu,即係若干年後,已經由小姐轉型為女士嘅妳。聽落有啲可疑,但我知妳會選擇信住先,因為妳八卦,一定會將呢封信睇完。

如果呢次超時空郵遞冇出錯,妳而家應該 17 歲,就快中學畢業。好多人話揀大學同選科,係一個影響一生嘅決定,呢樣嘢的確會喺你身上應驗。

廣告

雖然已經有兩間排名幾好嘅大學收咗妳讀 social science ,但妳依然日日期待郵差送信。因為妳第一志願…唔係,應該係唯一志願,係嗰間排名較低嘅大學音樂系。

因為嗰間大學音樂比較好嗎?唔係。

廣告

因為你熱愛音樂嗎?更加唔係啦,妳十六歲半之前都冇諗過讀音樂。

實情係,妳根本冇諗過咩前途問題,淨係想入男朋友讀緊間大學、同佢讀埋同一科,然後可以日見夜見。妳個人就係咁,成日錯重點,連揀大學都可以咁兒戲。😑( 👈🏼呢 D 公仔叫 emoji 啊,未來嘢嚟㗎,係咪好得意呢?✌🏼😎)

寫呢封信,係要為妳帶嚟一好一壞嘅消息。好消息係,妳好快就會收到唯一志願嘅 offer。壞消息係,開學前一個月,妳會聽到突如其來一句:「我諗我地都係唔適合一齊。」

我對你坦白,並唔係想勸妳改變主意,而係希望你思考吓「選擇」到底係乜嘢?

當初突然決定讀音樂,由於從來冇計劃過,妳要比人加倍努力準備,但係一分手,又突然唔知讀音樂係為乜。人生好多嘢都係咁,千算萬算後孤注一擲,以為選擇咗「最好」,最後人算不如天算。

其實呢,根本冇人可以喺下決定一刻知道,一個選擇係啱定錯;一切從來都取決於我地點樣行以後嘅路。妳埋怨、自暴自棄,呢個選擇就註定係一個徹底錯誤;相反,你欣然接受、好好咁行,即使一開始事與願違,都可以慢慢修正,迎接一個好結果。

我唔記得 17 歲睇咗本 Stray Birds 未,入面我地好鍾意嗰句 “I cannot choose the best, the best chooses me” 大概就係咁解。

由於你經常錯重點兼一時一樣,以後揀錯嘢、 get 錯嘢嘅例子係多不勝數。總之係妳自己揀嘅,就咪怨, just suck it up, laugh it off and march on 。

感情裏面受傷係無可避免,更傷嘅陸續有來。即使係咁,以後面對咩人,都唔好因為怕受傷而閃閃縮縮。因為與人相處,只有用真心先可以換到真心;每換到一次就可以抵銷一D舊患,計落其實幾化算。放心,愛惜你嘅人會比憎妳嘅人多。

做咗大人真係好長氣,如果要逐樣提,真係可以寫多二萬字,譬如甲油唔好揀粉色、嚟M前唔好食蟹同綠豆沙、出街唔好飲有奶嘅凍嘢、人地講個笑話唔好笑,妳唔好望開或者「哈哈哈」咁樣假笑敷衍人等等……不過算啦,講你都係唔會聽,撞多幾次板就自然會改。

總括嚟講,妳由 Miss Yu 變成 Ms Yu 嘅過程將會錯漏百出、論論盡盡,但正正因為無數嘅意料之外,呢條路先會咁好玩。

記住,每個選擇背後,無論原因有幾荒謬、幾錯重點都唔緊要,決定咗就開始行,遇上不乎預期嘅狀況, suck it up, laugh it off and march on 就得㗎喇。

Cheers,
Ms Yu

P.S. 好好愛爸爸媽媽,養大妳係一個嘔血的過程。

原刊於作者博客作者 Facebook 專頁

發表意見