立場新聞 Stand News

街機十大都市傳說

2018/5/9 — 12:02

作者 facebook page 圖片

作者 facebook page 圖片

作者按:日前分享過街機回憶,當然唔少得呢篇《街機十大都市傳說》。關於總統山攞鎖匙,更加係傳說中的傳說!

意猶未盡,群情洶湧,朋友叫我多寫幾篇,我就覺得差不多了。打機近20年,至2000年後見機鋪越變越光,開始無癮,地少人多租貴到飛起,當然是其中一個原因,其實東主寧願入更多跑馬推銀搵大錢,也是造成機鋪式微的兇手。

廣告

打機,都有都市傳說,以下十項,係殘存腦海的回憶,也有不少係同道中人告之,不知真假,如有高明,不妨留言分享,冇互聯網的時代,真係幾假都有人信。中佬一枚,打機真係不滅回憶。

麻雀機食天胡
二十年前有麻雀機,二十年後一樣大把人玩麻雀機。有上海呢隻唔係打麻雀既,亦有真係打牌既,好多人話一開牌有食天胡秘技,但麻甩仔最關心既,其實係打麻雀學園,點先可以爆機睇人除衫!之後仲有野球拳同其他形形式式既咸濕game,例如「劃線」等等,但充其量都係少少咸,多多趣,同而家垂手可得的thisAV爭幾十條街。

廣告

1943貓紙
經典飛機射擊game,好多人識背日本二戰時的戰艦同戰機都係因為佢,最少你一定會記得利根、赤城、飛龍、亞也虎同大和,到而家我都仲有首主題曲鈴聲在電話。1943經典在於你總會見到有神人係成個畫面都係子彈下,仍然絲毫無損,逢關過關。呢隻game有好多方式chok武器,當時不少人會寫低貓紙落去打機,打完再小心袋好。

打到去非洲
所有人都聽過,但我冇去過,就係街霸一可以打到去非洲。據講係總統山度不斷出昇,昇中第二個總統華盛頓隻耳仔,就會跌條鎖匙落嚟,之後執起就可以去非洲,阿Ryu到時仲會出一陽指。你身邊總會有個朋友話見過,或者堅持試過添,但我就從未見過囉!之於街霸2就梗係話會有「昇龍」出來啦,其實咪又係吹水!其他仲有同司令draw 10 round就會有豪鬼等等,不一而足。

撞過王晶
好多朋友都話,係佐敦老尖附近的機鋪撞過王晶。當時的王晶仲算正常,拍既港產片都會諷刺吓時弊;九十年代拍戲套套大賺,所以王晶可能好得閒,好多朋友都同佢玩Virtul Striker時挑機。我當時係個頭兼職,日日都打機,但冇見過佢,有人話佢好鍾意用荷蘭,唔知係咪因為同荷蘭叻好熟呢?

用線穿銀仔、電撻出術
兩蚊打鋪機,而家睇番覺得好平,當時讀緊書就覺得好多,唔少人都會諗「縮數」,有人發明在一蚊銀中鑽孔,入完後再扯番出來,無本打機。更有人會帶架生,打開入銀個位自己按掣,細機鋪就好難,因為唱錢阿姐會睇實。亦有人話用粒電撻,辣一辣入銀個位,自然可以多一鋪。

旺角草薙京
街霸之後,拳皇興起,甚至有全國的KOF大賽,用投射來玩簡直經典。草薙京同八神庵兩大最紅角色,更加係唔少MK朋友的至愛。當時走在旺角街頭,你一定會見到成街八神髮型,草薙打扮;到再過幾年cosplay興起,以上兩個角色同不知火舞,更加係歷久不衰。其實餓狼都有唔少擁躉,但就去唔到KOF既聲勢。當時打KOF,有唔少高手都話贏過大賽,真假難分,但有機鋪就真係放左隻盃係唱錢個位,吸引唔少高手專程來跟機。

Cyber City 廁所有人搞野
如果要選記憶中最臭廁所,Cyber一定有份,基本上唔係就瀨的話,一定唔會入去。不過最神奇係唔少人都會聽到有人係廁所搞野,講到繪聲繪影;我未聽過,但機鋪深處就有唔少男女打情罵俏就真,但你唔會敢望。另一個傳說當然係最埋最入個度打死過人,亦都有人話收埋好多「架生」,方便隨時劈友開拖。

滑板、打鼓、跳舞機
成日打機,今時今日會被人話係廢青,其實當年街機有極多體感game,Cyber有滑板機,真係有唔少板仔落去,至於打鼓同結他都紅極一時,個個band友都長期打躉。至於跳舞機更加係傳說,當年幾多人打完街機,仲買埋PS1既跳舞毯返屋企玩,Butterfly更加係個個都識唱!當年旺角新之城近收工時間,例有舞王出沒,個個都睇到嘩嘩聲。

Photo hunt 集體爆機
去到後期,唔少街機都老幼咸宣,Photo Hunt就係其中之一,而呢部機亦都特別多人圍觀,因為見你就夠鐘,就會出手幫忙,大家齊齊篤,但就從來冇見過有人打爆機!另一個圍觀game係紅過一排的問答機,入面加左唔少本土情懷,香港元素,「你在街頭,忽然看見,宇宙飛碟」,一講完,個腦勁loop!「解說!」

全港最勁機鋪
一定係長江。當年細細個入去睇人打,有位都唔敢坐低,事關有無限咁多高手等睇你出醜,一鋪機,打三、四個鐘等閒事,因為百幾人跟機。據講有個高手叫軍佬神,未嘗一敗,又有個叫天下第四,唔知排名點嚟。而當年係呢間機鋪確係高手如雲,少過海唔敢講,至少九龍區坐二望一。其他入圍的當然有靈機、天星、靈精,同沙田第一城入面的機鋪,不過唔記得左名。呢幾間機鋪的另一特色係打「國際例」,好多時不設讓round;至於點解叫國際例?冇人知!


ig齊齊睇波,歡迎follow。
https://www.instagram.com/sendohbun/

仙道彬手記
https://sendohbun.com/

#街機十大都市傳說
#打街機 
#PhotoHunt
#總統山
#SF1
#機鋪 
#靈機 
#街霸 
#KOF
#CyberCity
#金星 
#趣樂街

原文 2016 年 5 月 6 日刊於作者 facebook

發表意見