立場新聞 Stand News

【讀書報告】《乍現》— 原來衛斯理也會老

2019/12/6 — 12:07

本人小時候體弱多病,小學二三年級已經又血壓低又貧血又急性腎病,突然要停學入醫院住咗成個月又抽骨髓又手術乜乜物物,出院之後要戒鹽一年,只可吃淡而無味的食物,可能物極必反關係形成長大之後咸咸濕濕。恢復上課之後嚴禁上體育課足足十二個月不準參與任何運動(其實我也不明白病後唔係應該多運動強身健體嗎?可惜家母已登極樂銷售咸鴨蛋未能追問原因!)幸好外公在油麻地街坊中交遊廣闊,路邊書報攤街邊小書店的過期未過期書報雜誌五毫子小說予取予拐,閱後歸還分毛不收,從此書蟲基因深埋於本人體內直至今天!

三年級未完已經睇晒三國,西遊,水滸,紅樓睇咗一半實在頂唔住賈

寶玉林黛玉薛寶釵史湘雲金陸十二釵一大堆情愛故事,最後丟抵直至中五之前先睇番幾次。最吸引我嘅除咗一大堆公仔書小流坭小魔神小傻仙超人之子李小龍壽星仔老夫子之外,就係另外一大堆短篇小說,鐵拐俠盗呂偉良( 唔係呂良偉),七劍下天山,亦舒金庸古龍,女黑俠木蘭花,浪子高達,亞洲之鷹羅開,當然仲有不可或缺嘅衛斯理同原振俠,反而麻甩之神蔡瀾先生到中學先開始接觸,從此呢幾位嘅著作每一本都無一錯過直至今天!

廣告

倪匡先生好幾年前已經宣告寫作配額用盡,寫到第 145 本 「只限老友」從此封筆,之後授權佢老人家最欣賞嘅「天字第一號倪匡粉絲 」,物理博士葉李華先生續寫「衛斯理回憶錄」,《乍現》已經係第十一本,不得不承認,相當好睇!李先生騰籠換鳥思想轉移般化身成衛斯理,將 145 集故事再加上原振俠,羅開,木蘭花,浪子高達等從新整理變成一個 「倪匡宇宙系列」,有晒編年史,加上佢本身物理學家嘅知識潤飾修補當中嘅漏洞,令故事(盡量)更合情理!

最新一篇故事《乍現》,良辰美景,戈壁沙漠,温寶裕,齊白康維十七世,天工大王甚至羅開都一一現身,感覺直情好似同一大班老朋友久別重逢一樣,好正!

廣告

唯一覺得 Shocking 嘅係,故事中提到原來衛斯理今年已經七十多歲了,一直以為受過嚴格中國武術訓練嘅佢會停留在精壯之年,但原來同現實嘅我哋一樣無一倖免會隨住年月老去 ...... ! 

現實與虛幻,原來都敵不過時間,所以,有得玩好玩,免得日後感嘆!

完!

 

 

發表意見