立場新聞 Stand News

鏡頭多過乜!牛棚公園係打卡熱點定監控重點?

2019/10/24 — 14:21

攝於牛棚藝術公園

攝於牛棚藝術公園

鏡頭多過乜!牛棚公園係打卡熱點定監察重點?

早排睇新聞話,牛棚藝術村嗰頭開咗個新公園,睇相見有啲紅磚頹垣,好似好好 feel 咁,連劉江華都話要將嗰度打造成「打卡熱點」。咁我當然要同側邊嗰個去私影吓!

初頭入到去,我見到一大個空曠嘅廣場,有啲唔知遮唔遮到雨嘅避雨亭,下面放咗啲藝術品,有啲生曬青苔,有啲花碌碌嘅動物。另一面,紅磚牆掛起啲白衫,好似曬衫咁款,又幾夠街坊喎。我哋去嗰日可能係周末啦,所以都叫有啲人坐吓hea吓嘅,平日就唔知會唔會好冷清喇。不過開咗就快成個月,打卡嘅人唔知,但呢個點一定未熱囉!

廣告

攝於牛棚藝術公園

攝於牛棚藝術公園

廣告

重中之重當然係廢墟位啦,但好似未有人發現咁。藝術村嗰邊有人私影緊,但都唔識得走過嚟呢邊,呢邊明明規靚好多。紅磚啦,頹垣啦,仲要有大樹啦,陰陰森森咁,夜晚應該更加好 feel。不過,最煞風景係嗰啲花碌碌嘅動物。明明好懷舊,但整幾件咁光鮮嘅嘢喺度,要影相影得靚,鏡頭會就得辛苦啲囉。其實都 OK 嘅,不過無呢幾舊嘢,有多好多 angle 可以影囉。而家嘥咗個場,少少咁啦。

攝於牛棚藝術公園

攝於牛棚藝術公園

仲有一點我唔明嘅係,條條紅磚柱都 SM 咁款鑲曬黑色鐵,搬唔走啦。睇個色又咁鮮咁乾淨,斷估都唔會係古蹟掛?駛唔X駛咁多部 CCTV 影住個廢墟啊?!我哋喺個廢墟行嚟行去,行咗好幾個圈,見到起碼有四部 CCTV。計計數先,政府話成個牛棚公園就6,000平方米,睇公園個地圖(我希望佢係按比例畫啦),個廢墟最多佔成個公園⋯⋯四分一?差不多吧?咁即係1,500平方米有 4 部 cam,每 375平方米有 1 部 cam。密唔密過太子站月台?!唔駛 FC 都知呢度 CCTV 密度高好多啦!

攝於牛棚藝術公園

攝於牛棚藝術公園

影完相,我要同側邊嗰個再行一轉個公園,發現其實成個場度度都掛好多 CCTV 囉。「牲口棚牆」又係一個監察重災區,但明明不過係啲水泥矮牆,有咩咁重要,要咁嚴密監視呢?牛棚係古蹟就係唯一嘅原因?側邊嗰個臨走時問我:「你話呢度會唔會係未來公園?」吓,我話咩話?佢繼續講:「智慧燈柱,智慧公園啊,死蠢!」

果然,喺 1984 嘅國度,監察無孔不入。諗住去公園 hea 吓 relax 吓?咩係 relax 啊?咪 X 傻啦你!

發表意見