立場新聞 Stand News

雜誌雜思

2020/7/13 — 16:04

作者提供

作者提供

本人從小就鐘意睇書睇文字,由連環圖,公仔書,漫畫到小說,到散文集到雜誌。細細個家住油麻地九反之地,外公及父親為咗想我少啲出街少啲機會接觸三山五嶽人仕,有意無意間直接或間接鼓勵我愛上閱讀 ......... 行動包括不定期攞啲過咗期嘅連環圖,平價書籍或者不同種類雜誌,返屋企俾我睇,而塞豆窿嘅本人又果其然中伏,從此與文字書本結下不解之緣,歷時接近半個世紀。

喜愛連環圖與漫畫令我不知不覺間踏上設計,美指之路,喜愛文字更擴闊咗我本來有限嘅街童視野,更甚者閱讀不同嘅雜誌令讀得書少無機會讀大學嘅我等井底之蛙,能夠涉獵接觸九龍半島彈丸之地嘅世界之外嘅世界,遠在《壹週刊》 出現嘅年代,書紙印刷到A4 size 嘅《號外》,已經息勞歸主嘅 《學生時代》, 《突破月刊》 ,《新時代》,《好時代》,《青年週報》,《電影雙週刊》,《東Touch》,曇花一現嘅《LUI》,《Uptown》 ,屹立不倒嘅 《君子》等等,都替我成長提供不少養份,近十年廿年最喜愛嘅雜誌,首推 《Jet》同《武剛車紀》,數碼世代之後雜誌經營越嚟越困難,《武剛》由月刊改雙月刊最後無聲無息壽終正寢,其實不無感概,《武剛》最好睇其實反而唔係講車部份,而係文字同別出一格嘅內容,講「零」感學,講小眾 Resort 酒店,一啲都唔 Stupid 嘅 Very Stupid Questions,余宗明嘅另類影評書評,梁老總寫內星人寫內家拳,我懷疑根本曾在田其實都係梁老總,金成嘅文章 ...... 都俱往矣!

廣告

始終本人呢種鐘意睇文字嘅少數族裔買少見少,係宿命亦幾乎係必然,紙本雜誌嘅Judgement day 似乎在劫難逃,即使轉戰電子版亦未必能夠苟且偷生,未來必定係圖象勝於一切,以文字為主嘅雜誌捱得一日多一日,渺小讀者如區區本人,只好既訂閱電子版又買實體書表示忠心支持,但可以仲睇幾耐?我諗蘇文峰加楊天命加麥玲玲都預計唔到!

好在,我有大量存貨,翻睇一次都應該捱到三五年嘅,之後?

廣告

再翻睇一次囉!

發表意見