立場新聞 Stand News

一個政府的垃圾程度

2020/1/30 — 17:31

假若有這一幕:在擠滿人的車廂,一個沒戴口罩的大媽咳了兩聲,周遭人紛紛罵她、厲她,她哭著伸冤:我真的不想,我的口罩已用哂,我周圍撲都買不到呀!

我們可以怪她嗎?

一個政府有幾垃圾,視乎佢賤視市民生命的程度。口講無憑,明明妳就好似鬥氣,所作所為係由得人自生自滅,連前線醫護人員的防疫/消毒物質都可以短缺,明眼人睇見妳講一套做一套,只覺噁心、偽善。尤其大難臨頭,做決定慢幾拍不特止,仲要掛住刷老細鞋,但其實個老細自己都好大鑊,只係想妳生生性性,唔好再添煩添亂,偏偏妳就搞到市民想買個口罩都唔知點買到,想保護自己同屋企人都保護唔到,隨時再搞鑊更加杰撻撻的蘇州 X 出來。

廣告

張建宗上星期反駁穆迪降香港評級,力言特區政府的管治意志猶在。這句話既低能又得人驚。低能在無嘢搵嘢嚟講,正如普通人唔會無啦啦話自己仲有生存意志,突然咁講,欲蓋彌彰,就梗有啲嘢好唔尋常,譬如患絕症,成個人得番棚骨,痛到落唔到床,朋友擔心,你想安慰對方就可能會咁講。其實大家知乜事。張建宗若非鬼拍後尾枕,就係想用好婉轉的方法話畀全世界知:大家要有 PK 的心理準備啊!

管治意志,是以民望為依歸的執政意志。當然不是指簡單聽從主流聲音行事,而是基於自己的理念和價值觀,化為政策倡議,和民間聲音良性互動,運用最大的理性,在不同意見拉扯、碰撞之中尋求一個均衡點,並持續更新。林鄭掌權出來,除了土地大辯論有少少開放予民間去理性議政的影子(大辯論以搵地而非城巿規劃為前提,本身有不當預設的極大謬誤),其他乏善足陳,而且越來越離譜。就算搞個大頭佛出來,搞到中聯辦換大佬,林鄭和三萬個綠色 object 依然故我,止暴上腦,堪稱極品。

廣告

事實證明,林鄭有的是監獄長那種把囚犯管到貼貼服服的意志。是,好得人驚,即係香港市民和監躉無太大分別,堪稱黑獄斷腸歌的特大加強版。如果妳聽話,哄得我開心,我咪畀多碗飯你食囉,如果唔係?咪話粥水都無,我仲有好多方法炮製妳/你。所以,佢發茅起來,可以去到好盡,唔理任何政治後果和市民權益、感受,在夾萬拎返緊急法出來用都得。總之獄長大人唔高興,妳/你唔會好過,鬼叫你班死監躉搞到我由與習同行的無上光榮跌落嚟變地底泥。總之,防疫還防疫,止暴制亂先最要緊,反正習總成日提住呢幾個字,實無錯。於是佢同三萬個靠山竭盡所能維持香港這個大監獄的秩序,將抗命者繩之於法。現在連藍絲都頂佢唔順,勇武起來阻止佢亂 Q 咁來害人害物,佢依然企得咁硬,就只能講一句,攬炒之母,並非浪得虛名。

 

作者 Facebook

發表意見