立場新聞 Stand News

一萬蚊可趕走林鄭,制唔制?

2020/2/29 — 15:10

唔係標題黨,真係 work,但時間無多!

明年就係特首選委的選舉,由於區選大勝為非建制帶來 117 席特首選委,林鄭 777 就變成 660,再少 60 席就不足法定當選門檻 601 席。其實有唔少界別只要大家肯課金,要令中共/奶共唔夠票,絶對做得到!但時間無多,因為有條陰濕規則,大部分界別要早一年行動才有資格登記做選民,即係今年 5 月 2 日前要搞掂相關手續,例如課金加入某個商會,注意入會申請也可能需時 1-8 個星期。順帶一提,立法會傳統功能組別的選民資格同時可以投特首選委。

需要課金多少?以下最貴的一兩個商會,需要年費大約五千元(但勝在任何行業適用),今年入會至特首選委選舉,就要交兩年會費,大約一萬元。較便宜的,每年花幾百元,但有特定入會資格條件。點解肯課金就可攻陷某些界別?因為要俾錢,以前中共睇死無乜香港人肯入。同埋有數據睇到,以下精心挑選的界別,潛在合資格的選民數目至少 10 倍於當選票數(見圖一),即係人海登記戰術可以好易贏。

廣告

圖一:潛在合資格選民數目(詳解參看〈換特首只需四萬素人新血,三個月截止!〉: https://bit.ly/2uJ0lRa )

圖一:潛在合資格選民數目(詳解參看〈換特首只需四萬素人新血,三個月截止!〉: https://bit.ly/2uJ0lRa

廣告

圖二:可以課金攻陷的界別及資格(圖內連結及 FAQ 參看〈中小企可令立法會及特首選舉變天〉: https://bit.ly/32kZK4B )

圖二:可以課金攻陷的界別及資格(圖內連結及 FAQ 參看〈中小企可令立法會及特首選舉變天〉: https://bit.ly/32kZK4B

注意,每人最多一張個人票及一張團體票,但不可同界別。如擁有多個公司,可授權其他與團體密切聯繫的人。如果你無公司,你想課金入以上商會攞票都唔得。(例外:紡織及製衣界的專業人士可入圖中的某個學會)細細聲講,政府豁免商業登記費後,就算連埋搵秘書公司幫你搞手續,開一間公司最平幾百蚊搞掂,如需借商業地址另付數百元。

好彩,仲有方法係唔駛課金又唔需要有公司,就係湊七個人成立工會,搶勞工界 60 席,成立工會的登記費係零。留意,係成立而非加入,因為不論工會大小,每個工會只有一票。其實工會唔一定搞罷工,搞個聯誼會丶足球之友也可以是工會,只要會員是同行業/職業就行,可以唔用自己公司名義搞工會。這個界別因為一直輸二百幾票而 60 席全輸。咁以前點解無人做?一來泛民未盡力或有政治潔癖,二來手續最煩係寫工會章程。

但宜家有工會神器 7up.hkpetitions.com 幫你自動生成章程,仲幫你搵人組隊添!稍為不足的是,該網站的字眼「搜尋界別」,意思其實是指搜尋行業,字眼上容易混淆、誤以為加入其他功能界別。

有關成立工會的 FAQ,參見拙文〈多謝醫管局員工陣線,請加兩大絕招,三箭齊發!〉的 FAQ 部分。

另一個接近零課金的方法:湊三個人成立藝術社團,搶文化界 15 席。所謂生活即藝術,藝術即生活,藝術的定義很廣泛的。詳情見〈終極懶人包,全民湧進小圈子選舉攻略,剩返唔夠三個月!〉

用乜方法都好,記住時間無多,立即行動!

最後,喜見連登有人整咗個 chatbot 幫大家認清自己可以參加什麼功能界別,利申:本人未仔細玩這個 chatbot,未清楚其 QC 是否足夠,簡單評價係非常值得鼓勵,不過見到某些協會資料似乎有缺漏,建議可以在合適位置加返選舉事務處的相關 link,因為雖然要平衡簡單易用,但某些字眼及 disclaimer 之類可避免誤會。

發表意見