立場新聞 Stand News

中共蠻橫自討苦吃ㅤ民間交流份屬正常

2019/10/12 — 14:24

資料圖片,來源:Athens Democracy Forum Facebook

資料圖片,來源:Athens Democracy Forum Facebook

早前收到邀請,到雅典出席 “Athens Democracy Forum 2019”,活動旨在透過不同講者嘉賓交流,去探討現時民主世界所面對嘅困境。我參與嘅討論當然係關於香港民主運動以及目前所面對到嘅挑戰,我所講嘅內容無非都係呼籲國際社會多加提防中國極權擴張、香港所爭取嘅只不過係中方一早於聯合聲明所承諾嘅自治及民主,希望國際社會繼續關注香港嘅抗爭。中方竟然一再指控我係「極端暴力犯罪行為的幕後黑手之一」,似乎真係印證佢地完全唔知道呢四個月嚟香港發生咩事,係咩暴政暴行逼迫市民上街反抗。

過去參加過唔少類似嘅活動,公民社會之間嘅交流亦份屬正常。ADF 一向都邀請到非常多重量級嘉賓,今年就有希臘嘅總統及總理、愛爾蘭總統、斯洛文尼亞總統、雅典市長、哲學家 Bernard-Henri Lévy 等等,論壇最大嘅合作伙伴係《New York Times》,實在睇唔到主辦方點解要因應中國領事館嘅扣帽子、發爛渣行為要有任何退讓。事實上,今次中國駐希臘領事館如此高調發聲明譴責,更加引證到海外交流、將香港故事放喺更大嘅平台上傳播,最能令中方忌諱。

繼 NBA 等事件後,中國一再喺國際事務上失去儀態格調,只會令國際社會再次加深共產黨蠻不講理、極權輸出嘅形象,可謂玩火上身。中共唔尊重公民社會嘅自主以及以歪理管治,就莫怪全世界都鄙視你。

廣告

 

作者 Facebook

廣告

發表意見