立場新聞 Stand News

人大勢藉禁蒙面法釋法

2020/4/10 — 14:02

【文:未忘人】

上訴庭今日裁定政府就緊急法及蒙面法嘅上訴部份得直,FB一片哀鴻,唔少人大嘆法治又死。不過,失望歸失望,呢件事最重要嘅意義並唔係案情本身,而係政權想通過呢單官司達到D咩目的。

今次上訴庭裁定政府以緊急法訂立蒙面法一事合憲,非法或未經批准集結下不准蒙面亦合法。當然無數手足會因此而被提告,但另一方面,今次嘅裁決其實冇想像中咁重要,因為無論結果係點,雙方都一定會上訴至終院。勝算如何,未忘人法律知識都有限,評論唔到,但可以肯定嘅係,無論終審庭點判,人大都必然會趁機釋法。

廣告

未忘人想提提大家一件可能忘記咗嘅事,就係當原審法庭上年11月裁定政府「雙違憲」之後,人大法工委已經即時撲出黎,話佢地「強烈不滿,嚴重關切」,指斥「判決的內容嚴重削弱行政長官和政府依法應有的管治權,不符合香港基本法和全國人大常委會有關決定的規定,法工委正研究全國人大代表提出的有關意見和建議。」呢番說話,已經講得好明白就係打算人大釋法。當時法工委係咁講:「香港特別行政區法律是否符合香港基本法,只能由全國人大常委會作出判斷和決定,任何其他機關都無權作出判斷和決定。」又長又冗贅,簡言之就係中共想削法院司法覆核嘅權力。

根據香港法律同過往經驗,人大釋法有兩種,一種係根據《基本法》158 條由終審法院或政府提出,另一種就係「無法可依」嘅人大主動釋法。今次泛民表明上訴,咁重大嘅案件終審法院極可能受理。未忘人相信,人大就會藉機釋法「加辣」,因為今次將會係中共剝奪法院「司法覆核」權力嘅最好機會。當「法庭已死」,咁所謂嘅法治就可以完全成為港共嘅統治工具,而香港人再唔會有任何合法嘅抗爭手段。

廣告

值得一提嘅係,上次梁游宣誓案,人大釋法係早過法庭裁決既。雖然法官係判辭話唔駛藉釋法,本地法律都可以做到判決,但當中嘅無形之手顯而而見,結果論嘅話亦確立咗 DQ 制度。如果今次終審法庭接納泛民上訴,人大亦可能重施故技,呢個做法嘅好處就係可以令法院冇可能做出同政府對立嘅裁決,減少對立之餘重逐漸蠶食法院嘅中立性。

不過,大家唔好誤會,未忘人唔係反對對民主派上訴,反而認為上訴至終審有其必要性。因為咁樣做先可以戳破「法治已死」嘅虛幻迷思,因為法治已經唔係死咗咁簡單,而係變咗做喪屍咁不斷咬香港人。法律界同好多香港人依然奢望香港仍有法治,但當人大連司法覆核權都剝奪埋嘅時候,或者所有人都要面對現實。

事實上,司法一早已淪為政權工具,再無險可守。我哋今後可以做啲咩?只有團結抗爭,先有望爭取到香港人應得嘅真正法治。  

作者 Facebook 
 

發表意見