立場新聞 Stand News

今天下午那記者會的對象不是香港人

2019/7/29 — 19:44

今天下午那記者會的對象不是香港人

中共要向香港人發的話,基本上都已經發了。現階段看不到要有加碼的需要。
而且呢單嘢係林鄭月娥自己搞出來,中共不會自己攬哂上身。
雖然不斷有遊行示威,有暴力衝突,但係基本上香港警察仲係控制到局面。

現在的問題,是擔心一連串的示威遊行活動影響了國內民眾的觀感和情緒。國內媒體近期的主要策略,是把整件事炒作為少數港獨分子,受到西方勢力的搧動搞出來的。基本上是要抹黑香港的年輕人及示威者,令整件事顯得像是刁民搞事,連後生仔圍攻丘成桐都作得出咯。

廣告

中共最不想大陸民眾知道香港人其實是要爭取民主,也不想承認是中共在香港錯誤政策造成香港政府的胡作非為。事件到今天鬧大及不斷拖下去,最令中共擔心的是可能會令更多國內民眾知道真相。所以今日這場戲首先是做給國內的民眾看,為國內的媒體及各界的言論定調,也從而要主導國內民眾對事件的判斷角度。

標準的說法一定會講,乘機也會算在美國佬頭上。當然也要撇甩中聯辦那些官員在這件事的角色,否認在元朗搵到武器嗰架車關佢哋事!當然梗係要警告下你哋班友,唔好衝擊中聯辦呀!冇面俾㗎!

廣告

當然也一定會撐政府同警察,這一點江澤民早已經說過。對這一點如果有懷疑,是 Too simple, sometimes naive。幾個月後如果真係要掃佢林鄭落台,到時又自然會有另一個說法及理由,當年老董還不是這樣。

況且,中共現時仲有牌在手。到適當時機搞掂林鄭,然後由接手那人正式說撤回,作個承諾,甚至進行獨立調查,其實對中共唔會好傷㗎咋!到適當時候,呢招一定用!甚至俾新接手嗰個改組埋行政會議又有乜所謂。相對而言,比起出動解放軍呢一招,本小利大得多。而且,你估中共唔識計代價!

出解放軍?講笑啦!
如果真係出,真係咁講,咪仲多人上街!
知唔知幾多人想攬炒!

攬炒?你哋就想!
如果真係出解放軍,最傷係邊個?大家都明。
如果真係出解放軍,最着數係邊個?
即係洗牌嚟過喎!共產黨點會咁益你啲後生仔!

佢一定唔會話排除呢個可能性!
但現階段一定不會強調這個可能性。
對於中共而言,在香港現在這個局面下,其操作空間仍然很大。

凶吓啲海外傳媒、凶吓啲民主派、凶吓啲示威者,一定會!
撐警察、撐政府、撐中聯辦、撐吓啲奴隷派,也一定會。

出解放軍?係香港嗰啲左到上腦,仲癲過中共嗰啲乜鬼顧問、乜鬼政協、做奴隸做到傻咗嗰啲人至會咁諗!

應會更加要強調一下,「一國兩制」成功落實,唔需要中共中央出手。就算有海外勢力干預香港都唔會改變呢個事實。呢一句肯定要講俾台灣人聽!佢哋有幾多人聽係另一回事。

梗係要咁講啦,呢個時候,台灣國民黨啱啱先推咗韓國愚出嚟選總統,唔通第二日就向全世界講,向台灣民眾宣布,「一國兩制死得啦」!知唔知中共洗咗幾多錢係韓國愚身上?想蔡英文總統笑到咭咭聲咩!

唔會有啲咩新嘢,咪俾我睇死!

 

作者 Facebook

發表意見