立場新聞 Stand News

今日唔會再有香港人信林鄭呢個慣犯

2019/9/6 — 9:58

我真係好想問林鄭月娥,我哋民間做咗獨立調查研究咁多年,其實有邊樣妳真係有聽過?

當年清拆重建利東街,當年居民自發整咗個由下而上既「啞鈴方案」,規劃師學會拎哂獎,最後都俾妳在任期間狠狠打碎社區全毀。

2007 年,皇后碼頭俾妳拆之前妳搵咗規劃署開始研究「原址重置方案」,之後新聞稿仲話「往後的重置,以至整個中環新海濱的建設,我們是會聽大家的說話,我們一定會尊重市民往後給我們在設計海濱的意見。」隔咗兩年,就自己一鎚定音話唔會原址重置,令之前成個公眾參與報廢,依家去到 2019 年個碼頭重走埋數。

廣告

妳做發展局局長幫田生同地產商修訂條《強拍條例》護航,嗰陣有幾多民間政策建議都溫和到不得了,例如引入業主調解機制平衡地產商收樓權力,妳都係聽都聽唔入耳。

你再搵周永新教授研究咗個全民退保方案,其實已經係相當溫和,最後又係用完即棄,如果妳聽咗,啲有老人家嘅中下階層屋企就唔會有咁大壓力。

廣告

2017 年妳個特首選舉政綱有話過會發展棕地乜乜乜,我哋本研社呢幾年至少做過 3 個研究報告,寫過無數篇文,妳承諾咗嘅棕土政策到今日都唔知去到邊,剩係識得扮冇地掛著攪妳個萬億人工島。

徇眾要求一定要講埋 2018 年林鄭發起嗰個「土地大辯論」,又話好注重民意先攪個全民諮詢,本身個土地供應專責小組啲委員已經好唔中立,最後個報告妳都唔聽只係話會「參考」。最尾就剩係聽老董團結香港基金個研究攪大個東大嶼人工島,最多香港人支持既粉嶺哥爾夫球場同棕地就拖到天荒地老。

今時今日,香港形成咁深層次嘅問題,其中就係因為妳咁多年,一次又一次都當民間嘅獨立調查研究冇到,所以今日唔會再有香港人信妳呢個慣犯,搵啲專家學者親信做獨立調查研究係可以搵到深層次問題,因為妳隻眼只會睇到人哋係問題,no stake 嘅青年人係問題,而睇唔到自己先至係問題嘅根源。

 

(標題為編輯所擬)

作者 Facebook

發表意見