立場新聞 Stand News

回應政府:不如你公開條數先?

2020/1/29 — 11:38

政府專頁「添馬台」就昨日公佈限制內地旅客入境人數有以下回應:

//源頭截流是防疫最重要和最有效的方法。根據去年底的數據,內地個人遊簽注及赴港內地旅行團約佔內地旅客75%,加上禁止湖北省居民和過去14日到過湖北省的人士入境,以及減少跨境交通的運力,預計最終內地入境人士可減少約8成。

製圖者邏輯混亂,魚目混珠,試圖誤導公眾政府只停止流量少的口岸客運通關服務,意圖讓內地人繼續來港。//

廣告

首先呢,政府自己有冇定期公佈各種簽注赴港人數的數據先?你平時信息公開做得唔好,關鍵時刻就要人信你?唔係咁易㗎,葉師傅!政府資料一線通冇呢條數,入境處年報都冇呢條數,你啲數收得咁密又要怪公眾唔明,你出埋糧俾我好唔好⋯⋯我搵到最近的各種簽注赴港人數,已經係2017年的規劃署調查,當時話一般個人遊就佔40%,旅行團就冇數據,我都唔知信唔信你個「75%」好;不過同一調查就話來港目的係消閒的只有67%,假設上年數據都係咁上下,而政府個「75%」又係真的,即係每日都有8%的旅客攞旅遊簽證來香港但係目的唔係消閒,唔知佢哋做乜呢?

不過我知上面都係口同鼻拗喇,再講無謂。你話八成嘛,好,口講無憑:

廣告

本人現向政府要求在資料一線通公開過去十年的下列數字,並承諾以後會繼續在資料一線通每日公佈最新數字。

1) 以各管制站分列的出境及入境人數,以本地、內地,及其他地區居民分類,每日點算。
2) 以各種簽注分列的內地旅客人數,每日點算。

唔好話你冇存備,如果唔係你點講得出「75%」呢個數目字?來,讓細緻的數據重建公眾對政府的信心。如果政府顯示的數據說明真係減到8成的,我一定大大隻字幫你宣傳,立此存照。

作者 Facebook

發表意見