立場新聞 Stand News

如果林雪做特首

2020/2/7 — 14:07

圖片來源:林雪 Facebook

圖片來源:林雪 Facebook

自反送中,到武漢肺炎新型冠狀病毒疫情,有冇留意到一個現象,有好多平時斯斯文文、唔聲唔聲的男男女女,從來與粗口絕緣的他和她,竟然在自己的社交媒體瘋狂爆粗,日日夜夜都排住隊見到那些純文字如千年咒怨兼且心腸極為惡毒的帖文?

根據搞 big data 朋友統計,過去七個月,粗口指數升到頂點,可能係自開埠以來香港人講得最多粗口的歲月。低處未算低,既然林鄭已經做到這個田地,香港還真的需要一個特首嗎?說穿了,要找任何人做特首都一定不會比現在的更加估你唔到或更加差。其實,呢個位倒不如乾脆找林雪做啦!最起碼可以同香港人用粗口唱雙簧,真正「溝通與交流」,甚至互片,再唔使雞同鴨講,唔使再理得你喊破喉嚨、日日上街、罷工,有人就繼續「唔會畀你得逞」。

剛剛,國泰航空公司宣布從 3 月 1 日至 6 月 30 日將放三周無薪假,相信其他行業和大機構都會陸續進行裁員、減人工、迫放有薪或無薪假等措施。經歷過零三年沙士的香港人,大概仍記憶猶新當年的辛酸,但何解今日的慘況更遠甚於當年呢?

廣告

其一,當然係 2019 下半年已經經過反送中一役,依家屋漏兼逢連夜雨,雪上加霜,你話點會唔傷?

其二,當年的特首唔係林鄭,香港人上下同心,排除萬難,抵抗疫情,點似得今日內憂外患,雞犬不寧?

廣告

其三,「搶」,香港人由口罩,到搓手液,到消毒紙巾,到米,到出前一丁,到一眾大陸、韓國、台灣罐頭,再到廁紙和安全套,萬事皆因惶恐起,香港人的驚慌程度,好明顯已經進入竭斯底里的狀態。你睇,大家都係特首,澳門特首賀一誠,話全民戴口罩就戴口罩、派口罩就派口罩、錢依家唔使等幾時、賭場依家唔關又等幾時……相反,香港口罩唔使戴、戴咗要除番,關又封啲唔封啲,嘢又講啲唔講啲,香港人,點會唔被迫到瘋狂,搶廁紙,都變得合情合理。

 

原刊於《蘋果日報》

發表意見