立場新聞 Stand News

張建宗,你呃到自己,但都呃唔到香港人同國際社會!

2019/4/19 — 14:43

張建宗,圖片來源:rthk片段截圖

張建宗,圖片來源:rthk片段截圖

過去兩年,政府用過時殖民地惡法檢控示威人士、瘋狂DQ議員同埋取消參選資格,仲將外國記者逐出境、兼以《社團條例》取締政黨。結果,喺聯合國審議人權狀況既時候,各國史無前例咁關注香港,包括澳洲要求堅守一國兩制;英國要求保障香港自由;法國要求停止公民被失蹤既情況;加拿大要求參選不再設有政治篩選。

政務司司長張建宗雖然專程飛去日內瓦,但卻敷衍各國批評,厚顏無恥咁喺聯合國會議話「一國兩制係成功創舉」,仲強調香港要「抓緊一帶一路同埋大灣區既龐大機遇」。即係咁,緊跟中共主旋律,都係意料之內,但去到聯合國都要格硬宣傳大灣區,就實在相當奇怪。

過去都最多話「一國兩制行之有效」,點知今次就再吹得勁啲,好似人肉錄音機係咁重覆「一國兩制係成功創舉」,根本反映政府懶理國際社會對「一國兩制」倒退成「一國一點五制」既質疑。

廣告

不過,其實香港政府對人權議題既態度,向來都係相當差劣,浪費公帑既往績亦都相當多。喺本地,近日政府就被揭發特登印製新版本既聯合國《兒童權利公約》小冊子,將封面同埋雨傘插圖由黃色改為藍色,原因係話有新鮮感,但實情就係政治審查凌駕公民教育,先例一開,會唔會政制及內地事務局遲啲建議連立法會Logo都要由黃色轉藍色?

至於喺國際,最經典既例子莫過於坐喺度既政制及內地事務局陳副局長,上年八月用公帑十幾人一齊去日內瓦出席聯合國會議,居然被香港人見到走左去阿爾卑斯山旅遊。對比起話一國兩制係成功創舉,我覺得陳副局長公帑遊雪山先係成功創舉。

廣告

點都好,但正所謂無期望都唔會失望,即使張建宗喺聯合國話各國對香港人權狀況既關注「不必要、無根據、唔成立」,全部都係出於誤解,不過嚟緊國際關注陸續有來,政府繼續固步自封同埋自欺欺人,只會付上沉重代價。

張建宗,你呃到自己,但都呃唔到香港人同國際社會!

 

作者 Facebook

發表意見