立場新聞 Stand News

徵召愛港力量!回歸公院救港!

2020/8/3 — 17:13

作者製圖

作者製圖

藍色力量,國家有任務交比你啦!

第三波疫情喺香港爆發,唔少建制朋友都話要向中央請求派醫護來港協助。但係我相信,全世界醫療人手物資都短缺,我哋唔可以喺呢個時候,搶走中國嘅寶貴資源,為中央添煩添亂!

香港有萬四名醫生,現時喺 Dirty Team 主力喺隔離病房工作嘅卻只有 200 人。我相信,有無數愛國愛港,現時喺私營機構工作嘅醫生們,絕對願意亦都可以回歸公營體系、加入 Dirty Team 救港,為免加重中央的負擔!

廣告

九月時候, 600 名醫生聯署「拒絕沉默、支持警察、守護法治」,我相信呢 600 名藍醫生朋友都係愛港份子!今日香港形勢險峻,甚至隨時要勞煩中央,愛港醫生們又點可能坐視不理!

藍色朋友們!我哋一齊懇請愛港醫生們回歸 Dirty Team 救港。單單係呢個聯署已經有 600 名醫生,當中絕大多數係私家,只要佢哋返嚟公立醫院,Dirty Team 人數將會以三倍倍增。三倍!

廣告

香港總共有萬四名醫生,相信仲有無數咁多依家喺私營體系工作嘅香港醫生,都絕對可以被調配回公院工作。人手,我哋香港一定係有嘅!就好似亞博館嘅臨時醫療設施,中央專家團隊未到,我哋都靠香港團隊率先起好。見到呢個聯署名單多達 600 個愛國愛港嘅名字,我就知道,靠住愛港力量,我哋一定唔使麻煩中央,做個好孩子!

希望林鄭月娥做好特首職責。今日中國內有水災,外有美國佬干涉內政,已經夠亂了,香港唔可以再為中央添煩添亂!

希望港府出資聘請愛港香港醫生力量,如果高薪禮聘都係請唔夠人,就當機立斷,動用「緊急法」徵!既然用緊急法押後選舉呢個 hard choice 林鄭都做到了,請用緊急法、徵召聯署表上 600 名藍色醫生朋友,比佢哋實踐愛國愛港嘅精神,邊個不從就係黑醫黑護、反中亂港、罪該萬死!!!

只要一日,表上 600 名愛港醫生咪全部加入 Dirty Team,我哋絕對冇理由要中央派醫護來港!

認同請分享!
愛港力量,回院救港!
不要任性,勞煩中央!

 

作者 Facebook

 

發表意見