立場新聞 Stand News

擦鞋治港,篤灰救亡

2020/2/25 — 18:26

事實證明,林鄭唔打得,只係好擦得,兼篤灰都好得。

南韓疫情爆發,港府即刻封關畀你睇,向全香港唔妥佢嘅人發負氣:你哋想封關吖嘛,咁咪封囉!

林鄭親身示範,封關仍是有意義的,只要沒有損害中共的利益和面子。

廣告

林鄭親身示範,政府做事,可以很有效率,不會拖泥帶水,前提是,唔駛揣摩上意。你知啦,上意今時今日很難測,呢頭解封嗰頭封番,上晝同下晝可以唔同,唔睇定啲,好易擦錯鞋㗎嘛。

林鄭亦親身示範,幾打得都有龜縮之時。以往無論受到任何挑戰,事實擺在眼前幾咁對佢不利都好,佢都可以面不改容,敦起個款,嘴藐藐否認。死口唔認,死不悔改,係佢強項。但今次《蘋果》踢爆佢篤灰,佢居然唔第一時間出聲反擊,或發份聲明譴責番轉頭,話人地在抗疫時期搞亂檔,唔係真心為香港人設想。咁忍得口,太唔林鄭囉!咪等於間接承認份報告係堅嘅?

廣告

究竟邊個咁大整蠱放份嘢出嚟?仲有乜後著先?呢個亦係最令佢猶豫不決嘅地方。你知啦,樣衰唔緊要,得罪大老細就大大大件事嘛!傳言都有話,小心三月呀!

對於呢件極品嘅下場,普通市民理唔到咁多,亦唔得閒理,大家有時間都用來自救好過啦。而家最緊要?實,睇政府會唔會有乜依郁,為咗響應習總復工令,放鬆番對中國人的有限度入境管制,到時就白費先前防疫所付出嘅努力啦。

 

作者 Facebook

發表意見