立場新聞 Stand News

既然自殺做乜要益政府? 想法與藍屍的思考模式一致

2020/4/6 — 11:01

一個垃圾政府去到呢個地步,毫無公信力,我明白咩風吹草動都會入佢數同埋用陰謀論去睇,所以特首辦職員自殺,好多人用陰謀論去睇,我唔意外,也唔想幫政府講嘢,因為這是因果。但有一個論點,我覺得唔啱聽都要講。

好多人話,點解賠咗錢辭職,仲走去自殺,如果係要自殺,就唔賠錢啦,話呢個就係所謂嘅「疑點」。我覺得呢個point好有問題,因為我唔明點解大家會將自殺呢件事用功利仲要係用錢去計算。其實呢一點,同藍屍問「冇錢啲勇武會去犧牲博拉入獄」係一樣,就係覺得做乜嘢都先會計算實際利益才去做。

你覺得咁樣唔合理,係因為你好理性去計算:既然自殺做乜要益政府?如果換轉係你,最理性嘅選擇可能係同林鄭一鑊熟,不單自殺成功,仲留下英名。但自殺係一種理性計算出來的行為嗎?如果你仲保有理性,心中澄明,其實你仲會去自殺嗎?凌手足為這樣垃圾的政府輕生了,你覺得是理性計算出來的嗎?

廣告

真係要為「賠了錢點解五日後自殺」找個理由,簡單到不得了。受到極大壓力而辭職,賠錢都要走,呢個係極大心理壓力下做出的「非理性行為」,我加了引號,因為呢個更加係大眾的睇法。佢賠完錢走後,可以面對鋪天蓋地的壓力,例如家人、朋友不斷質問「做乜你咁蠢呀」。我識人做公務員最後跳返出嚟,呢啲人唔多,但都面對好多人同一個質問:「點解呀點解咁傻呀?薪高糧準鐵飯碗都走?」單係面對呢啲壓力,發現所有親朋都不明白你,你心志低啲都想死。

而整個網絡都在說「想死點解仲要賠錢走」其實不就是同一路嗎?假如你們的陰謀論落空,這句說話不也暗示當事人「做乜咁蠢」嗎?

廣告

說到他知道什麼秘密被自殺,其實,呢位公務員的職級和功能,都只係好低級,如果咁都畀佢知道咩秘密,要殺的人可太多了,林鄭也太蠢了,蠢到咁係唔會被欽點為特首,因為共產黨最着重係守秘密。

而事實係,早有跟過林鄭的人告訴過我,林鄭在工作上是最難頂的上司,特首辦的壓力肯定從未如此巨大(你只要回看林鄭在記者會如何待人接物可知一二),而且還要面對反送中和武肺兩大時代巨變,因壓力失去理智想去自殺是很可能的,但大家卻以非常功利的角度去思考這件事——可是各位手足們一直做的事,有什麼是可以用功利角度去計算的?

這一點,可想清楚。

作者 Facebook

發表意見