立場新聞 Stand News

是誰在滋養仇恨?是誰在散播病毒?

2020/3/28 — 12:54

圖片素材來源:香港警察facebook截圖

圖片素材來源:香港警察facebook截圖

一名二十二歲女警確診武漢肺炎,喺 24 日留醫明愛醫院,醫管局喺例行記者會入面指出該名女警喺抽血做心電圖時並無戴上口罩,即使兩名抽血員勸籲之下,仍然拒絕。兩名抽血員事後被列為密切接觸者,並需強制入住檢疫中心,當中一人更加出現病癥,需要留醫。

呢件事喺疫情在港持續失控嘅情況下引起廣泛關注,輿論直指該名女警蓄意違反醫囑、拒絕戴口罩嘅行為「缺德」。警方亦罕有喺 Facebook 回應,指「該警員防疫意識不足」,引起社會不安深感抱歉。喺近十個月嚟,警謊罕有地認低威致歉,絕無僅有,就可以知道呢件事由醫管局高層口中講出嚟係幾大鑊嘅一件事。 

「防疫意識不足」呢個解釋係完全站不住腳嘅大話!要講防疫意識之強,成個香港無人能出香港警隊之右。仲記唔記得只係喺長康邨康美樓樓下當值,咩人著住全套白色太空衣喺度自拍 selfie,而上樓工作嘅衞生署人員只係著簡單藍色防水衣?邊個部門拎嘅 N95、防護衣、漂白水係整個政府之冠?喺鑽石公主號乘客落船檢疫嘅時候,係邊隊紀律部隊企喺半隻船之外全副防衞裝備執勤?所以話警隊防疫意識不足完全係站唔住腳嘅托辭。

廣告

呢名女警嘅行為絕非偶然或者個別事件,其實喺十個月以嚟警謊以至港共政府刻意偏袒嘅必然結果。到咗今時今日,不論階級嘅警員已經成為社會上嘅特權份子,員佐級協會主席可以公開辱罵政務司長;事實證明無論做乜都唔會被追究,點錯都會有高層包庇同解釋,警員儼然凌駕法律成為超然嘅存在。恃住執法者嘅身份,對住律師、醫生定議員都玩弄於股掌之上;對於市民,更加係要拉要打,如取如攜,無任何制衡。自自然然,目空一切,高人一等。簡單啲講:「我係唔戴,咁又點?」

警謊已經將醫院視為佢哋嘅地盤,唔順眼嘅,駐急症室警崗話撤就撤;「天下之大,莫非王土」,醫院都唔例外,即使全副武裝衝入男士免進嘅產房又如何?醫生讀幾多書又點,我唔批准嘅,連同病人檢查、向家人解釋病情都唔准,否則就係「妨礙司法公正」。呢啲發生咗喺幾個月前嘅事大家仲記唔記得?既然警權已經膨脹到今時今日嘅地步,無任何制衡之下,試問呢位女警又點會聽從於兩個人微言輕嘅抽血員嘅勸籲呢? 

廣告

再者,警謊多番失控嘅執法行為已經完全反映咗對社會大眾嘅仇恨,該名女警蓄意不戴口罩行為或者隱藏一股報復心理。明知被社會大部份人所唾棄,第一名警員確診後全城開香檳慶祝,大家都叫「三萬,thx」嘅時候,呢種報復性嘅心態早已經深種喺每位警員腦海入面。會唔會係呢種心態致使該女警刻意傳染俾曾經反對警暴嘅醫護身上?佢嘅動機係咪同一啲中國大媽喺外國周圍吐口水傳染全世界嘅心態一樣?

戴口罩係為咗保護自己之餘更加係保護身邊嘅人,免得將病毒傳播俾其他人,所以戴口罩從來都係自律嘅表現,公民責任嘅體現。過去十個月,大家都睇得好清楚香港邊個部門最無紀律同自律。邊個部門喺衞生署多番呼籲要減少人群聚集之下仍然大開明星飯局、退休晚宴?該名女警喺新一波疫情爆發嘅時候,仍然違反林奠多番公開呼籲,到 All Night Long 酒吧消遣並染上肺炎,作為公職人員咁嘅不負責任行為有無失當之處?

鄭麗琼轉發懷疑射盲印尼女記者嘅報導唔會煽動仇恨,反而係警謊選擇性執法,凌駕法治、妄顧公眾健康嘅不負責任行為先係真正滋養仇恨,散播病毒嘅泉源。

發表意見