立場新聞 Stand News

林鄭月娥能無愧?

2020/4/5 — 11:08

圖片素材來源:《nevermind》

圖片素材來源:《nevermind》

面對不知幾時才平靜下來的疫情,面對因此而引致的經濟困境,世界各地的領導人及高官現在都帶頭減人工。是自願也好,是為形勢所逼也好,在文明社會作為掌握公權力的人,就要向社會展示擔當。面對如此的社會困境,就要帶頭表現出一種願意問責的精神。作為一種姿態,起碼又可以象徵願意共渡時艱。就算不是真的要承擔那個問題的責任,這種姿態也是公職人員應有的政治風範與態度。

今時今日香港,要求如此特首及那些官員知問責,講風範,真的太過不切實際!佢哋如果知個醜字點寫早就已經自己鞠躬下台了。但既然有版俾你睇,好嘅唔去學,仲要反其道加人工?知唔知咩叫慚愧?這是什麼玩法?要做到這樣要有幾無恥?

當無恥變成常態,當警察仲衰過黑社會,當高官只係諗住自己的權位,當所謂領導人只知擦鞋表忠,所謂擔當、所謂風範,確是陳義太高。林鄭月娥領導下的這個政府,過去一年做過啲乜?做成點?大家心裏有數!睇吓啲民意調查,睇吓整體香港人點樣評分,睇吓香港人對香港社會、對一國兩制、對北京嘅態度,已經由不滿、反感,去到充滿敵意,以致完全否定。對於這樣的政府,要求佢哋講問責、講風範,等於求佢哋去承受擔當唔起嘅奢侈。

廣告

不過既然佢哋經常講中國人好有歷史,又經常抬幾千年文明出嚟當作是自己卑劣嘅遮羞布,佢哋知唔知早在兩千年前荀子已經講過:「不知羞恥,乃不能成人。」佢哋今日算係乜嘢人?

今日搞到全國唔知死咗幾多人,又搞到全世界陷於溶斷處境,當權的竟然還夠膽搞個毫無誠意,擺到明係做騷嘅悼念活動,就係要食人血饅頭,簡直可以說是無恥之極!

廣告

香港呢班高官及這個特首,到今日仍然縱容黑警蝦蝦霸霸,越嚟越離譜,搞到成個社會動盪不安;抗疫搞到到喉唔到肺,總係慢三拍;對於疫情之後可能面對的長期經濟窘境,又完全睇唔到有咩藍圖;又面對市民強烈不滿,佢哋竟然夠膽話加人工!

我記得詩人白居易寫過一首長短句詩,題目叫《能無愧》,以第一人稱來講自己做官做到可得到飽暖,可以穏坐,可以有奴婢供差遣,又可以弄孫為樂,但佢最後都要質問一下自己:「回看左右能無愧,養活枯殘廢退身。」唐代另一位詩人韋應物也為官,也曾經寫過兩句詩:「身多疾病思田裏,邑有流亡愧俸錢。」即係話社會動盪,自己作為官員𢭃咗人工都心中有愧!

今日這個特首及這班高官,面對市民嘅強烈不滿,面對疫情引致嘅社會不安,面對長遠嘅困境,對民眾嘅不滿不但無動於衷,還不知反省。特首面對六成人俾零分,仲要繼續撩事鬥非,好官繼續為之,人工繼續照𢭃,俸祿繼續要加,可以說是毫不知恥,也毫不知愧了。

就贈這個無恥特首一闕《能無愧》

《林鄭能無愧》
卑陋獰邪面,腥臊臭穢身。
尸位泯闕德,竊碌負斯民。
恃官殘民唯奸猾,作賊放狗盡兇頑。
面對港人能無愧,枯殘廢賤尚加薪。

發表意見