立場新聞 Stand News

要上網睇香港歷史檔案有幾難?150 年殖民歷史得 101 份文件!

2018/7/3 — 21:24

香港前途研究計劃製圖

香港前途研究計劃製圖

香港嘅檔案管理有幾落後?最明顯嘅除咗冇檔案法之外,好多檔案服務都差強人意,比如香港政府檔案處嘅網上藏品。

今時今日將檔案數碼化上載到網上係大勢所趨,令公眾更容易接觸到檔案,作參考和研習之用。根據政府檔案處回覆立法會議員莫乃光嘅提問,我地嘅香港檔案處都「不落人後」,150 萬藏品當中已經數碼化咗 85,000 多項歷史檔案,但有幾多上網睇到呢?睇翻香港政府檔案處網站嘅網上精選館藏文獻「紀錄香港」,從 1841 年代到 1990 年代近 150 年嘅殖民歲月,原來只得 101 份文件 — 即係平均每年只有 0.68 份。

呢啲香港檔案處嘅網上檔案唔單止數量少,而且冇得搜索,僅有嘅 101 份檔案都唔係完整嘅檔案,只係零散嘅文件,甚至只係封面加一兩頁內文。公眾至多只能感受下當時事件的氣氛,難以做到較完整嘅閱讀和整理。當中,1980 年代更冇一份直接涉及中英香港前途談判內部討論嘅檔案文件,只有尤德爵士就職典禮致詞、1983 年身分證設計、港幣聯繫匯率聲明等已公開資料。

廣告

咁英國國家檔案館網上檔案情況如何?現時,英國國家檔案館有網上嘅檔案庫,搜索「香港」共有 3,219 份數碼化檔案。呢啲數碼檔案係完整嘅檔案,大部分都要付 3 英鎊不等下載,部份檔案可於檔案解封的首月免費供人下載,若原檔案是菲林檔更可無限期免費下載,方便公眾存取和閱讀完整檔案。

對比香港檔案處同英國國家檔案館嘅網上檔案,我地睇到兩種處理網上檔案嘅思維:前者從「展覽」嘅角度處理數碼檔案,公眾只能閱覽檔案的一小部分「試味」,感受事件嘅氣氛;後者則是用「研究」的角度管理網上檔案,公眾可下載完整檔案作研究用途,整理事件嘅來龍去脈。

廣告

檔案唔單止係屬於過去嘅「展覽」,更係研究「過去」同理解「當下」嘅素材。請問香港檔案處幾時先更加開放網上檔案,真正做到「研究」用途呢?

 

#狙擊檔案館

原刊於香港前途研究計劃

發表意見