立場新聞 Stand News

警謊明星隊治港班子出台

2020/2/18 — 14:01

網上流傳一段警隊高層與「明星足球隊」飲宴嘅片段,警隊一哥 PK 鄧席間「妙語連珠」,引起公眾嘩然,警方獲傳媒查詢回覆,該聚會係 2 月 16 日,警隊員工係工餘時間嘅友誼球賽後私人活動,不涉及任何公帑問題。但係當中反映警隊嘅禮崩樂壞,比起餐飯邊個埋單嚴重百倍。

朱門酒肉臭,路有凍死骨

而家係咩日子?係過萬人冒住寒風冷雨通宵達旦排隊買口罩嘅時候;係獨居老人、清潔工要重用口罩,足不出戶嘅時候;係滯留武漢、滯留鑽石公主號嘅港人惶惶不可終日嘅時候;係佢哋口中嘅港獨暴徒、黃絲「曱甴王」喺全球搜羅口罩返港嘅時候係林奠做緊公關 show 戴住口罩去屋邨派口罩俾老人家係陳帆做 show  拎住漂白水去洗的士嘅時候。但係與此同時,香港有一班「忠誠勇毅」嘅「公僕」,有 CSI 口罩供應嘅警隊高層,一邊出聲明講自己喺疫情下「緊守崗位」,絕無「貪生怕死」,一邊風花雪月,夜夜笙歌,原來警謊就係咁樣「同心抗疫」。「朱門酒肉臭,路有凍死骨」最赤裸咁展現喺香港人眼前。

廣告

PK 鄧嘅講話對一眾所謂「明星」卑躬屈膝嘅態度令人瞠目結舌:佢唔識做警察,但係跟住成龍、方中信嘅電影就學識,原來香港「一哥」嘅訓練就係睇電影咁兒戲?區議會答辯對 PK 鄧嚟講只係曾志偉式《開心字典》嘅一場鬧劇笑話,連公關 show 都不如,仲唔係對民意、民主嘅終極蔑視?

何以警隊可以肆無忌憚?

廣告

警隊嘅 mandate 從來都唔係嚟自人民,唔需要顧及形象,「槍桿子出政權」,軍政府管治從來唔係建基於人民嘅擁戴,用高壓手段去維繫統治,要嘅係維繫內部嘅穩定性,所以鞏固警隊內部士氣係最重要嘅目標。

一般大眾再討厭警隊,民望再低又如何?你可以做啲乜嘢?再粗俗啲講句「你吹得我脹咩?」即使有八成香港人俾警隊零分又點?佢永遠有剩番個兩成核心盤,成龍、曾志偉、譚詠麟、陳百祥之流永遠都會擁戴,而成為社會嘅特權階層與既得利益者;三萬警察及其親屬、家人朋友儼然成為高人一等嘅特權分子;押注喺警謊嘅藍絲 KOL 都係一樣,想喺利益分配中分一杯羹。一哥當眾講「赴湯蹈火,在所不辭」八個字仲唔夠露骨?喺室內一眾警方高層面前大模斯樣食煙,凌駕法律嘅特權仲唔夠形象化?

對 PK 鄧嚟講佢哋面對嘅對象,只係剩番兩成人就可以。呢兩成「小眾」會出聲撐警,會到警署噓寒問暖,送水果、湯水,為自己內部營造一個「我哋係正義嘅一方」,「我哋深受市民擁戴」嘅假象,其他對警隊負面嘅消息,都係抹黑、分化、假新聞,係別有用心嘅「黑記」、「黑媒」嘅惡意手段,對《頭條新聞》嘅大力打壓就係最好嘅例子。「圍爐取暖」成為警隊內嘅向心力,呢班明星隊就係爐火暖意嘅來源。在席嘅郭嘉銓係現任警隊公共關係科總警司,江永祥係公共關係科高級警司,謝振中係前任公共關係科總警司,從佢哋喺宴會上落力投入嘅表現,就知道警謊心目中嘅「公共關係」係指要同咩人打好關係。

出信恐嚇民選議員、投訴香港電台,唔係要對外澄清,改善市民對警謊嘅形象,因為經已「衰到貼地」,公關 show 已經無任何意義。出信純粹係一種姿態,為咗凝聚警隊內嘅士氣,俗啲講「宜家我哋個『朵』俾外人搞,班手足好唔高興,所以大佬要做番啲嘢嚟為班手足出番啖氣」。宜家嘅警隊就係一個咁嘅「惡質」組織,用「假消息」欺上瞞下,圍爐取暖咁維繫佢哋執法嘅合理性。

昔日嘅香港警察被喻為 Asia’s Finest,淪落至今日警隊「一哥」向一班四十前年的過氣「明星」卑躬屈膝,不知仍在世嘅前一哥曾蔭培、李明逵有何感想,現時讀飽書,學士、碩士畢業嘅警隊精英分子會否覺得羞愧?

發表意見