立場新聞 Stand News

香港新疆化?大型監控與病毒檢測

2020/8/7 — 18:45

政府响冇事先諮詢過嘅情況下,隨手就指咗三間化驗所出嚟,話佢哋會幫香港人做 DNA 測試,一齊攜手抗疫。要各位香港人對中國感恩戴德咁樣。先唔去討論呢三間嘢到底有幾唔 qualified,我想討論嘅係,點解用中國製嘅化驗診所驗 DNA 有咁大問題。

DNA 攞到又點?

DNA係GDPR(歐盟一般資料保護規範)定義下嘅個人資料,即係可以憑著呢一項 data 搵出你係邊位。DNA 嘅其中一個主要功能是資訊儲存,從 DNA 嘅造成入面可以搵到同你外表、身體、遺傳相關嘅資料。簡單嚟講,攞到你嘅 DNA,我唔單止攞到你身體嘅相關資料,你屋企人、親戚嘅資料都可以從中搵到。

廣告

17 年開始,中國被揭發建立咗一個大型嘅基因資料庫,入面嘅數據當然唔係用嚟做福人民,而係用來訓練佢嘅面部識別系統(facial recognition)。透過新疆嘅集中營、強制性嘅健康計劃(Physicals for All),同埋好多小恩小惠嘅計劃(例如:你响廁所畀佢掃描一下你塊面,就俾兩格紙巾你),中國响冇得到同意、冇告知當事人啲資料會點樣處理、使用嘅情況下,收集咗大量個人資料,當中包括大量 DNA sample。

有咗DNA,同一個強大嘅面部識別系統之後,中國就利用DNA嚟抽取你嘅相關資訊,用嚟重組你嘅外貌,準確度非常高。有咗你嘅外貌資料之後,佢只要透過閉路電視進行人面識別,就好容易準確地知道你响邊度。香港而家呢一刻,根據文件,未計康文署、警務處、海關和入境處閉路電視的數目, 估計全港現時至少有過萬部攝錄機,遍佈全港18區。

廣告

攞到 DNA 資料係中國同香港政府响香港進一步實行大型監控嘅其中一個步驟。

DNA 資料送中完全合法

而期望政府同中國嘅化驗中心守法,保障香港人嘅資料同私隱,根本就係痴人說夢。 因為香港嘅《私隱條例》關於境外資料轉移嘅部份,由立法至今,從未生效過。如果有公司想將你嘅個人資料「送中」,法例上來講係完全冇問題,佢想做就可以做。負責任嘅公司理論上應該要晌你你將資料交俾佢哋嘅時候,話俾你知到相關資料會唔會轉移往外地;但觀乎中國公司嘅操守,呢件事應該唔會發生。

政府早前宣布擴大病毒檢測範圍,而計劃的唯一檢測承辦商是華昇診斷中心。華昇,除咗係中資之外,更屬於中國生物科技企業深圳華大基因;而華大旗下嘅新疆絲路華大基因科技與北京六合華大基因科技,因為涉嫌強制採集維族人基因研究,進一步打壓維族,而被美國列入黑名單。

响完全「合法」嘅情況下,難以置信華昇同另外兩家公司唔會將香港人嘅 DNA 資料送上中國,為中國偉大嘅監控事業作出一番貢獻。

我唔敢話、亦都唔想相信香港會變成新疆,但事實就係中共係步步進逼,想將新疆嘅監控系統引入香港,令到全民噤聲。中共無所不用其極都要將香港人納入可控範圍入面。香港人响過去一年已經展現出頑強嘅抗爭意志,而家嘅戰場暫時唔係街頭或者議會,而係我哋嘅醫療系統同個人資料上面,只要我哋保持警惕,唔好自願將我哋嘅個人資料雙手奉上,乖乖地留晌屋企,做好個人衛生,我哋會過到呢一關。

發表意見