立場新聞 Stand News

【9.5億咩概念?】差佬半年加班費,夠你班藝術家搣足九年!

2019/12/13 — 16:05

上月底,林卓廷率先爆大鑊,話差佬加班加到超曬 budget,要動用埋其他紀律部隊的加班費來填氹。大家開始醒起,年尾係時候追追數,到底你班「忠誠勇毅」食咗幾多公帑?!

登登登登!條數今日終於揭曉,盛惠各位納稅人 9.5 億港紙~ 9.5 億,到底係咩概念?

有消費調查話,深圳海底撈埋單,人均要 99 蚊。對有加班的 1.1 萬警員來說,每人每月多咗 1.5 萬蚊零用錢,即係可以食超過 100 次海底撈,一日食足三餐都仲得,諗起都覺得 fat fat。

廣告

認真諗,9.5 億係公帑,當然應該要以公帑論公帑先得 fair。咁我哋又睇吓政府平日點駛錢?千億基建當然比唔上,但好多恆常開支,年度撥款不過係幾千萬。對比之下,警隊開支真係非同凡響。

2019 年香港藝術節,年度預算大約係 1.36 億港元,但政府資助向來只佔大約 20%,即係 2700 萬左右。如果用 9.5 億包起藝術節,藝術節可以 carefree 地演足 9 年。

廣告

民政事務局每年俾藝術發展局嘅恆常撥款係 1.2 億,關乎超過 50 年藝團年度收入的支柱,還有數以百計的藝術項目。換言之,差佬加班半年,又夠呢班藝術家搣足 9 年。

民政每年資助「九大藝團」,最新加完撥款,都係大約4.03億一年。留意返,唔係一個機構,而係九個團,即係香港管弦樂團、 香港中樂團、 香港小交響樂團、 香港舞蹈團、 香港芭蕾舞團、 城市當代舞蹈團、 香港話劇團、 中英劇團和進念‧ 二十面體,一齊分個 4.03 億。差佬加班半年,「九大」可以玩到兩年。

政府成日都話支持港產片,發展電影工業。我哋又睇下電影從業員分到幾多?以「首部劇情電影計劃」為例,大專組及專業組分別可獲資助是最多500萬元及800萬元。差佬加班半年,即係夠支持 190 個大專組別的本地製作,或者 118 個專業組的電影出爐。

睇多個例子。旅遊事務署學日本搞藝術祭,「鹽田梓藝術節」上個月開幕。原本 2400 萬的 budget,現在修訂至  2000 萬玩 3 年,已經有唔少業界人士質疑條數乜咁大。試想像,差佬加班半年的 9.5 億放入去,可以搞足 45 個 3 年,問你死未?

唔同界別,當然有唔同關注。有人覺得兒童癌病基金運作一年,不過係要 3,295 萬,9.5 億足夠 28 年營運;也有人覺得工業傷亡權益會一年支出 725 萬,差佬加班費夠用足 130 年。重點係,公帑嘅嘢,向來唔係唔俾你駛,而係應駛更駛,用得其所。

正如資深傳媒人區家麟博士話齋:你交的稅,給警察練靶,給自己吃催淚彈。你覺得抵唔抵俾?

發表意見