人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/9/25 - 17:03

你真係當李光耀傻㗎咩

李光耀,資料圖片

李光耀,資料圖片

呢幾年,時不時就有啲商界朋友好似「好有見地」咁話,新加坡拋離香港好遠啦,你睇吓,人哋自由仲少過我哋多多聲啦,就係因為啲人夠聽話(而我哋好唔聽話又好任性),所以經濟發展得好過我哋咁多。

我都成日去新加坡,不過人哋經濟發展得好,唔係單單因為唔自由同聽話囉。呢啲斷章取義嘅講法,係用嚟昆蠢人嘅。如果單單冇自由同人民聽話就可以發財嘅話,北韓應該係全球經濟最好嘅地方啦,下話?

當你話人哋冇自由嘅時候,有冇「順便」提吓,人哋原來有一人一票民主選舉?講人哋好聽話唔任性嘅時候,又有冇「係咁意」咁講吓,原來人哋嘅政府對民意重視程度係超乎想像?又當你話人哋施政好有效率嘅時候,又有冇「講多句」人哋係獨立主權國家,唔洗下下跪喺度等呀爺指示?

廣告

你真係當李光耀傻㗎咩。

(原文無題,題為編輯所擬)

作者facebook