立場新聞 Stand News

反對刪除中文科卷三、卷四 — 五問五答

2019/8/19 — 10:52

【文:沉默是甘】

問:點解要反對刪卷呢?
答:
繼推普教中後,再一個去粵語化嘅政策,試圖降低學生對自己母語(粵語)嘅敏感度同使用度。
中文科嘅卷三(聆聽+綜合)、卷四(說話)嘅價值不止於基本溝通能力。其價值係在於訓練到學生嘅思維能力、理解能力、組織能力、口頭表達能力、即時嘅反應力,仲有敢於發言嘅膽量。因為卷三(聆聽)、卷四(說話)需要學生運用粵語嚟應考,所以學校/老師一定會利用課時針對特定議題,如時事、文化等,同學生進行特定嘅聆聽訓練同說話訓練,教導學生如何係一個雙方都使用粵語嘅對話中捉住對話嘅重點、要學生面對眾人發表自己嘅睇法、教學生點樣去回應別人嘅觀點等等。一旦刪卷,學校其實必定會將刪卷後淨落黎嘅課時用係操練讀寫兩卷,學生就少咗好多機會係學校學習點樣建構、組織、發表自己嘅觀點,去培養敢於表達嘅心,去裝備自己未來投身社會,用廣東話同人討論交流。

有線中國組:【粵語傳承有困難】 【三成廣州青少年不會廣東話

廣告

問:點解學校一定要有考試先訓練學生?
答:因為即使一間學校辦教育嘅理念幾崇高都好,現實都係好殘酷嘅。學校都有自己嘅成績表,要比社會睇、比家長睇。而呢張成績表就係校內學生嘅升學率(入U率)有幾高。中文科作為主科,入大學嘅要求最低都要有 level 3。我地可以好現實咁諗,當學校係以升學率作為目標嘅時候,係考評局刪除卷三卷四之後,多出嘅時間只會用來操練閱讀(卷一)、寫作(卷二),以務求學生係呢兩份仲要考嘅試卷入面取得好成績。根本唔會有人再花珍貴嘅課時去訓練學生對於粵語嘅應用。但係正如上面提及過,說話訓練涉及學生嘅思維能力、組織能力、聆聽能力、表達能力、即時反應等等,上述各種能力都係對於學生未來投身社會極其重要嘅技能。

問:點解有人話刪卷會削弱香港學生嘅優勢?
答:教育局今次提出刪減中文科聽說(卷三卷四),日後只考讀寫(卷一卷二),實際係想將香港文憑試中文科考試模式同中國嘅高考接軌。刪卷後嘅對香港學生嘅即時影響係閱讀寫作兩份卷嘅佔分比重會相應提高(各卷比重:閱讀:24%、寫作:24%、聆聽綜合:18%、說話:14%),變相兩卷定個學生嘅中文科生死,唔能夠平衡一個學生讀寫聽說嘅感力。而呢兩份卷都係香港學生弱項,當中以閱讀卷尤甚,根據《中國語文科考試報告及試題專輯》顯示由 2012 年至 2018 年,香港學生閱讀卷(100 分滿分)嘅平均分一直達唔到 50 分。

廣告

另外,因為呢次改革,我地可以睇得出係為咗將香港同中國兩地考試制度接軌,本地香港學生與新・香港人(受內地教育/高考訓練之學生)比拼之下,對方可謂贏在起跑線。唔係話香港學生能力唔夠人地嚟,而係當人地自小接受讀寫訓練嘅考試模式時,點比?再加上,現實話比我地知,其實一早已經有中國大陸嘅學生落嚟香港應考文憑試。講緊唔單止香港新移民或者跨境學童,而係真中國人。大灣區有唔少補習學校係幫佢地準備文憑試課程。呢班人係改制之後,會嚟香港考試嘅人數只會越黎越多,中國嘅中文科高考卷,難度大過香港文憑試,輕鬆係卷一卷二屈香港學生機。雖然考評局係 2018 年指大陸考生唔會拉高整體分數線,但現時政府嘅可信任度極低,難保他日再次改制,全面迎合中國市場。

大學線:來港升學走捷徑 內地生考DSE

問:廣東話(粵語)係我地嘅母語,即使唔刪卷唔考,我地日常都成日聽成日講,仲洗乜學校專登做口語訓練?
答:相信粵語喺今時今日仍然係大部分香港學生日常生活中最常用嘅語言。然而,擁有識得聽同識得講嘅能力唔等於擁有聽得明同答得準(捉到人地講嘢嘅重點+準確地回應別人)嘅能力。學生一般係日常生活入面,運用粵語傾嘅話題可能係傾下去邊度食 lunch;星期六日去邊度玩(發夢);搵邊個名師補習等等。呢啲溝通能力,只要母語係廣東話嘅人都能夠輕易做到對答自如。但係針對特定議題(如:文化、時事),學生點樣建立自己對相關議題嘅觀點、點樣係聽別人嘅看法時捉住重點,並就住人地嘅觀點做即時回應。呢啲關乎對學生思維、聆聽、組織、表達、即時反應等等嘅能力,如果冇經過說話訓練嘅情況下,唔係可以是但套返生活模式嘅用語答句「今日食啲乜好?是但啦」嘅「生活訓練」可以獲得。

今次刪粵語卷項呢項教育政策只係重啟「消滅粵語」嘅第一步,可以預視香港政府係刪除中文科涉及粵語嘅兩份卷之後,就會再次重推「普教中」,提高普通話係香港嘅地位,想達到嘅最終目的就係:消滅粵語,統一使用普通話。我地可以睇睇本身同樣係以廣東話作為母語嘅廣州,就係利用教育政策,透過學校令學生輕視自己嘅母語,多講甚至只講普通話。通過學校改變廣州新一代,從而消滅廣東話。

有線中國組:【普通話教學推行五十年】 【學生今時今日已不識廣東話俚語】
係呢次中文科改革中,唔難睇到有同樣嘅影子。香港政府都係想通過教育達到政治目的。個流程就係:「改變-削弱-消滅」,通過教育政策改變中文科制度,刪改粵語考卷──削弱新生代對粵語嘅使用度同敏感度──消滅粵語,做到語言上嘅大一統。只係依家香港目前嘅進展暫時仍然停留係第一步。因此係一個咁嘅情況下,我地更加要保存中文科涉及粵語應用嘅卷三及卷四。

捍衛粵語嘅工作可以話係刻不容緩,因為粵語地位被侵蝕嘅問題已經係香港靜靜雞發生緊。係日常生活入面,可能你都有遇見過一班後生仔出街係用普通話溝通而唔係用廣東話;又或者見到啲中小學生放學同同學傾計係用普通話。呢個情況係東鐵線/北區都係極之常見。因為香港嘅小學好多都行緊「普教中」,自細就培養佢地講普通話。雖然中學行「粵教中」居多,但亦有不少「普教中」中學。即使「粵教中」中學自己都有啲演變,例如一級入面會有一班係「普教中」等。而接受「普教中」嘅學生,係學校嘅生活入面早就養成咗只講普通話嘅習慣;而地區學校(北區學校尤甚)就面對跨境學童問題,班學生大多數母語係普通話,而我地香港嘅學生因為對自己語言嘅敏感度唔高,當同學只講普通話時,佢地會出於好意地遷就母語為普通話嘅同學。如果大人小朋友再唔有意識地、刻意地捍衛返我地嘅母語,慢慢香港就會變成一個講普通話多過講廣東話,甚至唔識再講廣東話嘅地方。

正所謂:「亡羊補牢,未為晚也。」企硬講廣東話,由依家做起。
香港01: 【普教中】一文睇清 全港小學中文科以普通話教學

曾焯文:香港淪亡始於小學普教中

問:咁應該點做?
答:對於中文科是次課程改革強烈建議:
1. 必須保留中文科卷三、卷四
2. 改革中文科制度:卷三、卷四,只容許考生以粵語應考
3. 要減輕師生壓力:簡化/刪除校本評核(SBA)

作者自我簡介:中學職場新鮮人,深信「學無前後,達者為先」。常言道:「沉默是金」,我卻認為在大是大非面前,「沉默是甘」,是跌得好「甘」個「甘」。

發表意見