立場新聞 Stand News

最多頭盔的官腔

2019/3/21 — 18:22

發展局局長黃偉綸

發展局局長黃偉綸

發展局局長黃偉綸公布「明日大嶼願景」工程造價「非常初步的粗略估算」,興建 1,000 公頃人工島,連同有關基建項目,至少 6,420 億元。朱凱廸按付款當日價格計算,認為成本高達 10,699 億姚松炎則推算整個工程造價約 9,500 億元)從黃局長的遣詞用字,便不難看出「明日大嶼」個財政黑洞有幾大,大到局長自己講出來都心虛,所以要買特別多的保險。

官腔不一定無內容,但一定要安全。講咗等於無講,抑或比無講好少少,有時睇妳/你戴幾多頭盔。不過,好似今次咁,一句話就戴三個頭盔,既「非常」,又「初步」,仲要係「粗略」的估算,就真係一個唔易破的紀錄。查實以政府的人力物力,就如此巨大的工程項目做財務估算,務必向公眾負責,用最嚴謹、全面和深入的研究方法去搜集數據資料,加以分析,才公諸於世,咁至能畀人認真考量得失利弊,不能貪快而求其交功課。現在為了向立法會闖關,只在乎打輿論戰,懶得理管治的穩健要求和公共財政的準確度。「非常初步的粗略估算」,即係話證明第日估錯咗都唔好追究我,是黃偉綸的免責聲明。咁點解明知唔準,都要交一些經不起推敲的數字出來呢?從 3 月 20 日《明報》的李先知專欄可窺到端倪:

「政府中人又說,發展局未來只能透過『解說』及『透明』,讓公眾了解填海利弊。在透明度方面,政府過往極少在規劃概念階段便向公眾詳列各項工程的估價分佈,今次就列明填海估算要 3,510 億元、4 條公路及 3 條鐵路造價要 2,730 億元,合共 6,240 億元。」

廣告

「非常初步的粗略估算」,在政治八卦專欄作者口中,原來被形容為「詳列各項工程的估價分佈」,而且以往很少見,證明政府有幾大誠意向公眾問責。心水清、痛恨大白象工程頻頻超支的市民,當然不會信以為真。但那些保皇黨死忠、大台的慣性觀眾和一些有羊群心理的順民,很容易便接受這套官方論述。只要佢哋相信,便為政府全力推動「明日大嶼」提供一定民意基礎。別以為保守、親建制的巿民都是 5 毛,無起碼的論述能力。其實除了極少數人,會大大聲話「係呀,我鍾意呀,無理由講㗎,吹咩?」之外,其餘就算邏輯有明顯問題(例如建制派議員),講嘢亂咁嚟的人,都是會和人講道理,都相信自己是講道理的。而且,總是覺得反對他們的人蠻不道理。所以,政府和建制力量才會不斷生產罐頭式歪理,畀自己友拎去用,作為治術之一種。

 

廣告

作者 Facebook

發表意見