立場新聞 Stand News

有錢仁

2020/2/18 — 13:25

李嘉誠

李嘉誠

為富不仁,幾乎係定律!

資本家巧取豪奪賺得金山銀山積聚億萬家財,傳子傳孫存款於瑞士銀行,流唔流芳百世無乜所謂,留番啲錢俾佢嘅二世三世先至係正道,社會有事天災人禍?有幾何燒到真正有錢佬身吖?富甲天下者幾曾會關顧天下?遨遊天下邊度冇事飛去邊度就會有,反正無限金錢從來就可以買來無遠弗屆!平民大眾甚至低下階層嘅福祉,應該係政府負責關鬼大有錢佬事?

誰不知偏偏係全香港最有錢嗰個打破呢個定律,過去大半年得佢為年青人講過嘢求過情,即使明知會被 Blue Man Group 標籤被口誅筆伐。然後一個月內再派十億八億俾困難商戶。疫症殺到,全港風聲鶴唳,口罩荒消毒用品荒廁紙荒,佢又不慌不忙一箱二箱運番香港,分俾醫護分俾老人分俾低下階層。即使幾十年嚟佢賺咗香港人好多好多好多錢,最憎人富貴嘅港燦就算唔講出口,都會喺心中講句:誠哥,多謝你!唔係在心中,係喺心裏面講!

廣告

馬丁路德.金(Martin Luther King Jr.)講過:「最大的悲劇,不僅壞人的囂張跋扈,而是好人的過度沉默。」

好人今次無沉默,但壞人的確囂張跋扈!

廣告

同樣係曾經賺咗香港人好多好多錢嘅一班昔日大明星大大明星視帝影帝,同黑警首領攬頭攬頸,什麼開心字典患難見真情盡吐心聲,忘記或是刻意忽視前線醫護人員同低下階層正處於無助困境之中,豎起手指公向打壓香港人嘅黑團體敬禮推崇!你哋在心中唔使講嘢,但我估有幾百萬人已經講出口,好後悔咁多年嚟咁愛戴你哋俾咁多錢你哋賺!當年嘅一班偶像,今日一齊令香港人反胃!從前滿戴光環嘅明星如今為搵食吮癰舐痔,滿嘴歪理。一班奴才自我感覺良好,但求苟延殘喘活一天算一天,對傷天害理之事冷感甚至挺身支持,枉費香港人曾經如此喜愛你哋!

天地不仁,以萬物為芻狗,但你哋比狗,更狗!

發表意見