立場新聞 Stand News

林奠新一輪抗疫措施東施效顰,錢掉落鹹水海

2020/4/9 — 12:16

4 月 8 日,特首林鄭月娥聯同主要官員召開記者會,宣布第二輪「防疫抗疫基金」救市措施。

4 月 8 日,特首林鄭月娥聯同主要官員召開記者會,宣布第二輪「防疫抗疫基金」救市措施。

1. 林奠同佢一舉港共官員再宣佈新一輪嘅抗疫救市措施,大手筆推出 1,375 億嘅措施去保企業、保就業,當中最大筆錢係向企業資助共 800 億支付員工一半薪金,最多九千蚊,聲稱約 150 萬名僱員受惠。

2. 計劃為期六個月,啲錢係俾個僱主,以強積金戶口做根據,要承諾係計劃內唔可以炒人,否則要嘔番啲錢出嚟,甚至係有懲罰。

3. 被記者問及點樣可以確保啲錢會落到喺打工仔身上,點樣可以避免僱主唔會拎咗啲資助之後放 no pay leave、減人工,甚至係倒閉,IQ 180 嘅勞福局局長羅致光答:宜家呢個政策係無任何誘因俾僱員炒人同減人工,反而會鼓勵佢哋會請番啲炒咗嘅人同加番啲人工去拎多啲資助。

廣告

4. 真係唔知佢 IQ 180 係點諗嘢,宜家講緊嘅中小企係個個月納空租、蝕大錢,人工只係佢哋嘅一部份嘅成本,而唔係全部,班高官都應該無落過街視察過民情,零售、飲食、娛樂、旅行社、服務業、健身、展覽行行都冰封,個問題嘅癥結係無收入去 support 個支出,就算政府資助咗一半人工,都只係蝕少咗一半人工,而唔係宜家有賺,租都仲係要交,強積金都係要供。

5. 舉個簡單例子,一間食肆,當五萬蚊租,請五個員工每人一萬蚊人工,每個月成本十萬,如果無生意做嘅話就蝕足十萬,政府代俾一半人工,就每個月蝕少 $25,000,但係都仲要捱 $75,000,你係老細,會唔會有誘因去加啲員工人工,加夠個上限每人 $18,000,所以可以領多啲資助?

廣告

6. 相反,啲公司更加有誘因去用 no pay leave 或者變相減低員工工作時數去領盡啲資助。因為個政策嘅前提下係唔可以裁員,只係人頭不變但係工作時數可以減半,等同裁咗一半人手同人工支出。用番上面個例子,可以每個員工放半個月 no pay leave,出少咗 $25,000 糧,因為人頭上無變過,仲可以 claim 到政府一半人工資助,即係實際出糧 $12,500 。

7. 而一啲本身係較高收入嘅打工仔更加會係僱主減薪(no pay leave)嘅 target。佢個上限係 $18,000, 超過 $18,000 都係收 $9,000 資助。所以一個員工如果佢人工係 $30,000,公司可能叫佢六折支薪,每個月返少四成,變 $18,000 人工,但係對於公司嚟講,一樣攞足 $9,000 政府資助,但係變相慳咗 $21,000 人工。

8. 再極端啲咁推算,為咗慳人工支出,減低因為生意慘淡嘅過剩人手,叫啲打工仔每個月返 1-2 日,出一成糧,照樣無炒人,照樣可以領政府資助,但係份糧根本不堪糊口。 

9. 由上面嘅簡單計算,就可以知道個政策係只係幫到啲打工仔 keep 住份工,但係逃唔過減人工嘅命運,失業率個數字可能因為唔准裁員嘅關係唔會大升,但係就業不足率同低收入人士嘅比例就會大幅上升。

10. 但係都唔可以怪啲老細,做生意就係要計數,唔計數根本生存唔到,啲資助雖然落佢袋,但係只能夠幫佢哋每個月蝕少啲、捱耐啲,而唔係幫助佢哋生存,半年落嚟要蝕嘅都係繼續蝕,提供政府保證貸款幫助資金流,但係始終要還,還唔到要清盤,只不過係政府用納稅人啲錢揹咗銀行條數咁解。

11. 人工少咗,消費都會隨之減少,經濟活動進一步萎縮,未來生意更加無望。個政策最大問題係洗咗 800 億但係無刺激到本地消費,根本性地挽救中小企業嘅收入來源,庫房嘅錢洗咗但係做唔到保經濟嘅效果。同派錢直接藏富於民嘅做法唔同,唔解決生意慘淡嘅問題,再多嘅資助都係抱薪救火。

12. 咁啲錢去咗邊?打工仔收入少咗,老細只係蝕少啲,最終啲政府資助咪又係去咗地產商同業主度囉。租唔減,商舖唔俾炒人要繼續捱,啲資助最終就係用嚟吊住啲舖頭條命嚟納吉租,最終就係延遲咗啲商舖租值因為結業潮而引發嘅跌勢。一日唔大幅減低租值同地價,無論咩資助都只係俾高租值蠶蝕。

13. 對於一啲 freelancer,無固定收入,無「公司」去自僱收錢嘅人士,係林奠眼中係真係無 stake,可以自生自滅,或者去領綜援啦,個上限加大咗一倍。

14. 學其他國家開庫保經濟、保就業,但係就東施效顰,公帑嘅錢洗咗,並無刺激疲弱嘅本地消費,只係間接輸送俾啲地產商同業主,香港人納稅嘅錢就係咁樣掉咗落鹹水海。

發表意見