立場新聞 Stand News

正經嘢梗係放假都要照做,唯獨港鐵

2018/6/19 — 16:07

【文:沉默是銀】

做老廉時,人哋放假我開工時常有,叫做「做 Op」 — Operation 是也。

一個行動,需要天時地利人和。無咩特別,當然唔會專登等大家放假 weekend / long weekend 時郁手。但係出得來行就知道,要選擇在 weekend op,或者係突然之間今晚 op,即使你 book 好哂嘢成棚人等緊你,你都要全部 cancel 將自己貢獻比正義女神。

廣告

例如當年轟動一時嘅十八鄉賄選,目標人物選擇在週日碰頭。由於牽涉目標人物眾多,而且案件性質敏感,禮拜日行動,係禮拜五上晝通知成個執行二科百九幾人取消休假,準時四點鐘返來 briefing 執行大行動。

聽完 briefing 梗唔係即刻放工,而係人人都要同自己個 partner 返位溫 file,做好準備,閒閒哋都要 OT prepare 個 op 先走得。

廣告

到禮拜日,正午十二點已經全部人集合,stand by 咗十個小時,等上頭指示先郁手。是夜,我搞到第朝六點半先落更,大老細話十點半再返來繼續。嗰個 op 一連三日,我基本上 72 小時內只斷續瞓咗 10 個鐘。

全世界正經嘢梗係放假都要照做。

唯獨港鐵。

土瓜灣站剪短鋼筋事件,牽涉安全問題。港鐵已經接二連三出事,上頭理應一方面對監管機構嘅要求好緊張,另一方面從 PR 角度加快行軍步伐,讓外界認為自己好緊張,扭轉公眾人士嘅負面觀感。所以就算時間緊逼,上頭應該叫下面「一係交報告,一係遞信,通宵都同我死掂佢」。哩個報告嘅 importance 完全等同一個 operation。

而且份報告理應放假前寫好哂,交報告只係 hit 個 send email button,頂多你高層第日早上先開記招交待。而家竟然「聽日先搭今日起飛嘅飛機」,搞到路政署 PR 放假都要覆傳媒「表示失望」(實情係目無王法)。

我之前已經話過港鐵管理層出現好嚴重問題。而家睇來更接近係山頭主義,哩個機構惡到無王管。

估計後面,政府要開佢刀都唔奇。

 

(標題為編輯所擬,原題為〈政府條鐵〉,原刊於作者 Facebook

發表意見