立場新聞 Stand News

醫護同學,找個位,這是你的開學禮

2020/8/13 — 14:52

作者製圖

作者製圖

今日,新一批年輕人接過Jupas放榜結果,又要踏上醫學這無盡旅途了。今年,係我係港大醫學院讀書最後一年,呢幾句話,寫比五年前既我睇,亦寫比今年入學既師弟妹睇,希望未來六年既路,你地走過之後,會無悔無愧:

一)無數人同你講過,但容許我再講一次,你未來六年既路,比你所能想像嘅,要辛苦上十倍、百倍。

二)如果你文憑試可以遊刃有餘、穩入神科,好快,某次醫科考試前幾個星期,壓力會令你第一次感受到:不停胃酸倒流、輾轉反側每夜失眠、極度焦慮抑鬱惶恐不安、不自控地挖損自己,然後發現身邊有一半同學都食緊某啲supplement或者藥物幫助入睡。

廣告

三)你係中學內可能係被全校老師愛錫既最高材生,但你有日會係教授面前聽到:「你係我咁多年黎見過最蠢既學生。」、「Jump out of the window.」(傳說中既罰企,企係垃圾桶內,我仲未經歷過,托賴。)

四)你地可能每一個都係中學最Top既1%,但你地之中,總有人會做全組最廢嗰個、會肥佬、會冧班、會被人笑。於是你會懷疑無數次,自己係咪無能力、唔適合讀呢一科。

廣告

五)係你最慘既時候,你會見到最神個同學冇帶電腦,但佢識既嘢多過你,即使你面前部MacBook開左十份Notes、四個Browser windows。

六)你亦會見到你既中同,讀緊Dental又好IBGM又好Law又好,佢地Drinking落Club船P打牌唱K,好似幾開心。然後佢地埋怨緊份Intern得九千蚊一個月既時候,你Send五封Email,終於有一間醫院比你做attachment,朝八晚六,當然一定唔會有錢啦。

七)你滿心歡喜,覺得就算冇House M.D.咁型,至少都可以著住件袍攞住手術刀做解剖呀。現實係你到三年大部份時間,都迷失在這場PtdIns 3,4,5-trisphosphate、HMG-CoA、PCSK9遊戲中。「究竟讀呢啲有咩用呀!!!」,一定係每個醫科生頭三年講得聽得最多既三大句子之一。賭咩都得,唔係既話,三年後你返黎搵我賠錢。

八)好學既你千祈唔好PM問我呢三個係咩。我唔記得哂啦,開返份Notes抄架。當年背左十次,先勉得考試嗰一日記得一啲夠合格,唔好玩啦。

九)如果你有講過「我想做Research改變世界!」,當你滴左五個鐘Micropipette,去到第2831個wells,First MCP joint關節痛既時候,而琴日個p-value係0.051,你就會開始重新考慮你講過既說話。

十)過年啦!爸爸媽媽好驕傲同姨媽姑姐講你就黎做醫生啦!你面前即刻有五個病人等你問症:一個表伯「枕住痛」、一個表叔隻腳好似比嘢「電下電下」、一個舅父「沾寒沾凍」、一個舅母「個頭浮浮地」、一個堂姑姐個媽「係大陸話有膠質瘤」,全部等緊你既專業分析。你個腦其實得金菇琴日教既Acetyl CoA定Acetoacetyl CoA。

係而家呢個香港讀書,點都唔見得會容易。二零一九,二零二零我地經歷左啲咩唔使多講啦。唔知我個學位會唔會寫住MBBS (Zoom),又唔知我下年身邊啲同事係咪全部說普通話呢?

為咩啫?

為嗰幾萬蚊糧?香港地,幾萬蚊都未必供到樓啦。搵得到,你日日係醫院On-call36小時,有錢都冇時間洗啦。到你真係儲到多少少啦,隨時講錯嘢,就比人凍結資產架啦。

但學醫既某一日,你總會聽到一個病人笑住同你講,「多謝你呀醫生」。你唔係醫生,我都未係醫生,但啱啱病好既公公婆婆唔識分架,見到著住白袍既你,佢都係會醫生前醫生後咁叫你,都會一樣咁多謝你。

「吓?我地乜都未識點醫好人點有病人多謝我地呀?」

總有病人會好感激你,只係因為你係個個忙到不可開交既病房入面,你行過幫佢遞左杯水、扶左佢坐起身、遞左個痾尿用隻「鴨仔」比佢、或者幫佢黎探病個仔搵左佢訓邊張床。就換黎一句,笑笑口既「多謝你呀醫生」。

「我讀醫係為左幫人。」

你聽過、講過、諗過,而家係時候做出黎了。

記住,係你成為一個醫生、成為一個醫科生之前,你先係一個人;你係為左幫人所以讀醫,唔係為左讀醫所以幫人。

行善,做一個好人應做的事,永遠係第一位。呢個世界,係課業內外,有好多個抉擇、好多個場合比你機會,去做一個正直有良知既人,為城內其他人改善佢地既生活、佢地既未來。

機會來了,就去做吧。望下呢幅圖既師兄師姐,真正既醫者、習醫者,會係呢條行善既路上繼續同你一齊同行。

This will be a crazy journey; make it worthwhile.

作者 Facebook

發表意見