立場新聞 Stand News

一位病友給 Elsa 的信

2019/11/28 — 19:24

資料圖片,來源:Pexels @ Pixabay

資料圖片,來源:Pexels @ Pixabay

Dear Elsa:(spoiler alert!)

.

.

廣告

.

.

廣告

.

你由細個開始就覺得自己同其他人唔同,身體入面有股能量隨時爆發、你好驚會傷害到你身邊既人,因為你控制唔到自己嘅身體。你當時都唔知原來係遺傳因素。

一開頭你提都唔想提,好驚俾人知。你家人好關心你,但都因為你關上大門唔敢分享而無奈同你疏離,大家都好唔開心。你其實渴望親密但真係好驚世界,好驚自己,唔識處理同人地嘅關係。好彩,喺第一集你終於願意面對自己嘅狀態,同家人坦白。(雖然過程中你受到不明白嘅社會排擠同羞辱,不過你係女皇,fuck the world!好過我每日起身都係:fuck my life)

而你妹妹都展示咗一個照顧者最強嘅 version:無論如果被罵被推開,都堅持陪伴,而且好清楚講等你知道你可以信任同埋尋求幫手。當然,僅僅咁樣係冇改變到你嘅狀態,不過隨住時間過去,以及家人陪伴,你似乎可以用意志控制住,亦都習慣了。

最近,你開始聽到聲,好似叫你去一啲地方。你瞓唔著,一到夜晚就好興奮,好多念頭。你想去未知嘅地方,你覺得有個陰謀只有你可以破解,有一啲壞人只有你見到。佢地想陷你嘅國家於不義。而且,你仲覺得自己好似超人咁勁(actually 你嘅力量係大到可以去 Marvel End Game 客串下)。

咁其實係有機會係早期嘅思覺失調。呢個唔係病,只係一個癥狀、或者 condition,有機會發展成唔同嘅嘢。

癥狀仲可能包括:覺得人地(eg 有權力嘅人)唔鍾意自己、多疑,敏感、講說話會傷害到身邊嘅人……

當人地問起都會傾向收埋自己同話:「冇事」。我都係咁「冇事、冇事」咗好多年。

直至我學識當人地問起:How are you? 時,答:Not good.

練習一次:「你點呀?」

答:「唔係好掂,我有 xxx,有機會坐低同你解釋下。」

咁到底你係咪有 xxx 呀?係睇醫生前係唔知嘅。

聽到聲音就未必係 psychosis,可能係憂慮症,鬱躁症或驚恐症。第一件事要正視,你向妹妹講已經係踏出咗第一步啦。(雖然拖到第二集中間,但永冇話遲嘅!都係個開始!)

我留意到,你會無啦啦喊,工作時集中唔到精神,唔想返工走咗去整冰雕,咁佢都影響到你作為女皇嘅工作啦,又有機會引致抑鬱甚至自殘,所以要及早處理。

最好有本簿仔記錄事件同埋維持幾耐,留意有冇一個 pattern 或 cycle。好多人係 in denial,又畏疾忌醫,對住自己都講大話,對醫生護士更會扮鎮定扮冇事(明明係你去睇醫生)。有本簿仔,咁見醫生時就算唔敢講,你成本日記隊俾佢慢慢睇都得啦!

私家好貴,去睇公家。你係女皇都係咁話㗎喇。

依家香港咁嘅醫療制度,最快見到醫生嘅方法係…… (&((ahel^£&&/))@{[£~>de &@@%€£{%kh(ladh(@(hut33)&) ……咳咳……

(搵朋友陪)咁護士會暫時關你在一個安全房,通知家人,你可以選擇入院或自簽出院。咁你情況尚可就建議自簽出院啦,咁好快就會排到期見公家醫生。一係就葵芳,一係就青山。咁我個人選擇青山醫院,除左 branding 品牌口碑之外,都係因為覺得愈污名化嘅地方,最要承擔。係同志身份教我嘅。邊度跌低就邊度起返身吖嘛。

咁就你講哂病情俾佢,佢會抽血啦,驗好多嘢,落診斷,開藥,以及同你慢慢調節藥量咁樣。

然後就係藥物幫助,食藥係有效嘅,要去搵醫生開藥。雖然話你心態上當自己傷風感冒啦(謎之音:the cold never bother me anyway~),精神科藥物目的唔係殺菌,亦唔係殺死細胞,而係調節同平衡腦入面嘅化學成分,同埋幫你啲神經維修基建,等啲電子可以快樂起跳躍呀!所以一定係 keep 住食,先至會有作用(同埋要克服副作用)。

副作用坊間有好多傳言,可能有誇張成分。視乎你食咩藥,係咪第一次食,同埋個人體質。有一啲藥如 Epilim 會同西柚有化學作用(同柑、橙又唔會,真神奇),一開頭會手震,口齒不清同埋認錯人樣(試過認錯 Connie 係游靜,食完餐飯先知,好尷尬)。

而 creative 嘅文化人最擔心影響創作,或者情感以至對世界既感覺麻木 etc. 我只可以講,精神藥物唔係鎮靜劑而係穩定劑。你都係可以 high 嘅,而且食咗藥之後,清醒嘅時候,我可以感受到好耐冇感受過嘅「開心」,嗰樣上帝從我腦袋剝奪走嘅嘢。而且反正,當你同情緒病天人交戰既時候,都唔見得有幾 productive 吖。半年嘔件 work, really?(Chan Melody 可作證)

至於工作方面,先唔好擔心會因此冇咗份工。照顧自己優先於為公司賣命。去睇醫生係有假放嘅,你可以同醫生講想放幾耐。我的確有朋友覆診紙被 HR 發現咗係 depression 而「被辭職」…… RIP,在世界被我們改變以前,醫生紙同覆診紙上可要求唔寫事由,以免老細唔鍾意。當然你退位讓賢然後做返份同你性格配合嘅工,都係好方法。

第二就係經濟援助,既然已經影響到你工作,如睇公家,可見埋院務社工,你可以申請藥費減免,甚至係殘疾津貼。唔好俾個名嚇親,情緒病係比起身體殘障更易申請到,每個月有 1,900 蚊,個人會定好多,冇咁怕俾人炒,亦唔會好似綜緩咁因為你賺多咗就扣少返,生活穩定都對病情有幫助。

而在醫生同意下,亦會批你兩蚊八達通,咁就加入我地「兩蚊閪」行程(yes it’s an actual term…)多啲去散心(或者對勇武正義的你來回魔境與阿德爾搞社運都有幫助!)廸士尼有優惠嗰啲就唔講啦你本身嗰度駐場,我想睇你去海洋公園救走埋啲殺人鯨海豚多啲(ah-ah~ ahaaah~~)免費㗎,仲可以俾安娜半價同行。

Well,你依家係精神界(spirits)同人類世界嘅橋樑啦,好多人都好羨慕你唔隊草都見到 LSD 咁嘅世界,雖然偶然 bad trip(所以記得有一個安娜陪住你呀)。我地從你嘅自我發掘,恐懼到接納,不斷交戰、克服、創造、突破、成長、不忘初心親身體會到精神病人嘅內心世界。希望你未來可以 show 埋你接受唔同嘅 therapy 同 treatment 嘅過程啦。

多謝你

來自遠方的病友
可樂

 

(標題為編輯所擬)

發表意見