立場新聞 Stand News

香港人唔好懶 — 疫苗數據自己睇

2021/3/16 — 15:40

打唔打 BioNTech 疫苗,係一個好複雜嘅問題,早兩日我用一個考慮對社會影響嘅角度分享咗我嘅睇法。今日,想從返醫學角度補充返數據,俾大家參考。

大家成日聽「BioNTech 有效率高過九成」、「好似副作用多啲」,都好似道聽塗說,但究竟現有數據全面真相係點?其實,BNT 嘅數據一律全面公開,上網可以搵到研究全文,大家可以參考以下兩篇學術期刊報告,自己再作決定。

我可以節錄一啲重點,但更加希望,大家作為香港人,應該有足夠嘅教育程度同知識,去理解部份研究數據。兩篇報告嘅連結我都放埋係度,Google 都唔使,希望大家自己試下睇一下,分享比身邊親朋,唔好依賴道聽塗說嘅所謂分析。

廣告

大家唔應該盲信專家,而我更加冇資格叫你打唔打。自己身體自己負責,唔好懶啦。


第一篇,係整合以色列 60 萬人接種後嘅數據。接種第二劑後七日,防止感染武肺嘅有效率係 92%。全文亦有細分,唔同性別、年齡、病歷史下嘅有效率,可以睇清楚。

廣告

“BNT162b2 mRNA Covid-19 Vaccine in a Nationwide Mass Vaccination Setting”

第二篇,係 BioNTech 嘅第三期臨床研究數據,整合 2 萬名打咗 BNT 嘅試驗對象嘅數據,有效率 95%。但睇呢篇重要嘅係,睇「副作用/不良反應」,因為呢點係上篇冇分析到嘅。

主要大家可以睇 Figure 2,分析咗喺唔同年齡層下嘅各種局部/全身副作用嘅數據。主要係 83% 人會接種處局部疼痛,47% 疲勞,42% 頭痛。

值得留意嘅係,有兩名接種疫苗者係研究追蹤期間死亡,死因分別係動脈硬化同心跳停止,但兩者都被判斷係與疫苗無關。而同期,亦有四名接種「安慰劑」(即係無打疫苗)嘅試驗對象離世,死因為中風、心肌梗塞、或死因不明。

“Safety and Efficacy of the BNT162b2 mRNA Covid-19 Vaccine”

先自己試下睇,特別係重點(abstract)。睇唔明嘅或者有疑惑嘅,先再向專業嘅醫護人員查詢。大家可以試下喺下面討論,原諒我冇時間逐個解答,但歡迎各位朋友互相幫忙討論。


最後,喺度都簡單講兩句我自己打完感覺點。我一個人嘅反應絕對冇任何科學意義或者代表性,只係預計有人想知想問我都分享定先。打完大約半日後,接種處開始痛,主要係郁到膊頭肌肉時先會痛,唔郁就唔痛。跟住痛咗大約一日半,而家都消退得七七八八。而我自己就冇任何其他不良反應,頭痛、疲勞等就冇。

我唔會同你講咩打完好興奮咩痛都唔痛,嗰啲都係呃人嘅。效用亦一定有,副作用一定會有,不確定嘅因素再少都好都總會有,再罕見嘅事,都可能會有人不幸遇上。所以大家自己睇,自己決定,呢個就係醫學倫理上 informed consent 嘅意思。

作者製圖

作者製圖

 

作者 Facebook

發表意見