假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2020/1/14 - 20:08

做得大將,總有其過人之處

蔡英文

蔡英文

好多人笑蔡英文「空心菜」,但學《火鳳》(?) 話齋,做得上大將的人總有其過人之處(無論喺邊處都好),而蔡英文在內鬥頻頻的民進黨內,由非嫡系變成總統參選人,仲要輸咗一次之後可以翻閹贏兩次,仲要破紀錄高票,點會係普通人物呢?

睇返,蔡英文的履歷在台灣政壇可謂無出其右,臺大法律系學士、美國「常春藤」康奈爾大學碩士、倫敦政經學院博士(國際商法)、東吳大學及政治大學教授、中華民國政府法律顧問及談判代表(李登輝時代)、陸委會主委及行政院副院長(陳水扁時代),中間做過一年不分區立委,所以學歷頂級、行政同立法工作都做過,仲係兩岸、外交、談判專長,你話 CV 係咪好難有人更完整。

亦都因為咁,雖然佢唔係民進黨嫡系,同民進黨行埋係陳水扁邀請佢入閣時,正式入黨係 2004 年,黨內有大把地位高過佢的大佬大姐,佢都獲選為黨主席同 2012 總統參選人。當然有部分可能係權宜之計,冇人肯做 or 派系折衷,但咁多人唔揀揀中佢,亦都係見佢履歷完整,風格形象亦走文青風,同阿扁年代嗰種周圍鬧交、同立委打交相反,以及相信佢真係有一定能力。甚至 2012 年輸咗之後,2016 年都再次由佢參選。

廣告

2016 年國民黨 8 年執政後,選民求變,加上國民黨內亂換柱,民進黨順風之勢,首次府院雙贏完全執政。不過蔡英文上任後民望好快下跌,好多方面都被批評,仲要 2018 年地方選舉大敗,似乎佢真係「空心菜」,但今次選舉又贏返喎,仲要得票破紀錄。當然遇到習總同七娥助攻係佢好彩,但我都講咗,就算有好時機都要識抓緊同適當反應,而蔡英文即時支持香港,將選舉主軸變返民主抗共,又打出「中華民國台灣」牌試圖趁國民黨「紅統化」同唔識反應吸納中間選民,依啲全部都唔係撞彩撞出嚟,係要有腦識作出決定點反應先做到㗎。冇腦唔識反應會係點,睇下其他政黨咪睇到囉。

最後,去台灣同班綠營志工傾計時有人提起,佢係談判專家嘛,情緒控制、形勢分析、適時決定都係佢強項。「你有沒有見過小英哭?」喺台灣,尤其綠營政客,選舉時打悲情牌打感性牌好常見,有時佢地自己都講到哽咽,但蔡英文真係無論順境逆境,你見佢都係差唔多樣,頂多微笑吓或者變嚴肅,但真係好笑見佢情緒波動大。佢激動發嬲,which is 又係一樣台灣政客常見的,我都冇咩見過。依個可能就係佢過人之處。

 

(標題為編輯所擬)

作者 Facebook