立場新聞 Stand News

【我的香港夢繪畫比賽】小朋友畫什麼? 勇武抗爭者、周梓樂、黃雨衣...

2020/5/8 — 12:36

今時今日講「香港夢」,我諗十個有八個香港人都會答你:「光復香港」。但對於小學生、中學生,佢哋嘅香港夢又係唔係光復香港呢?睇下佢哋畫啲咩,可能會有啲頭緒。

近期,由朱耀明、陳健民等任董事的香港公民教育基金會,搞咗個「第十五屆我的香港夢」繪畫比賽,主題係「手拖手,彼此關心,手牽守,握著公義」,分初小、高小、初中、高中四個組別。當中有唔少出色作品,可謂人才輩出。以下就同大家分享下小妹特別喜歡嘅入圍作品,排名不分先後:

1. 初中組《新聞報導》

廣告

呢個新聞報道畫面,一睇就知係TVB新聞報道啦。林鄭係度殘害各式「食材」,個個肉隨砧板上,神情痛苦,但係呢位茹毛飲血嘅特首刀下,終難逃一死。坐下角嘅「自油(由)」已經血肉模糊了。當「政府忠告市民:手拖手,彼此關心,手牽手,握著公義」,林鄭牽的卻是警察的手,握的是刀與盾。 政權暴力人人有目共睹,但呢個新聞報道就話「警方表示已用最柔和的方法制裁暴徒」。一睇就知 TVB 啦~ 

廣告

唔知呢位小朋友嘅夢想係咩呢?TVB執笠?我估佢可能係想香港唔好再出現為政權背書、歪曲事實的新聞報道吧。  

2. 初小組《一人有一個夢想》

人人期望可達到,我的快樂比天高~~等叮噹幫大家實現願望啦!口罩!選票!通通送比大家!哇... 連小學生都知香港人想要選票與口罩,點解我哋政府唔明架呢?同埋普通醫療口罩就得架啦,唔好比個底褲口罩我,ok? 

呢幅畫有個位,令人無法忽視,大家請望下第二排右二嗰隻綠色生物,小妹唔係好人的出佢係邊個,但副眼睛、神情同髮型,都令我聯想到林鄭,唔知大家點睇呢?~ 

3. 高中組《只差一點點》

只差一點點,即可以再會面。只差一點點,就能夠得到自由。

呢幅水彩畫讓人心痛,兩隻手,一隻被頂在木板,一隻被鎖上手扣,傷痕累累,佈滿鮮血。但仍想要握住彼此。反送中至今被逮捕人數逾七千,上週一名 21 歲救生員認罪,成為首名反修例示威者...抗爭者的犧牲與鮮血,政權的荒謬與不公,下一代都看在眼裡,不會遺忘。 

4. 初中組《獅子山下》

我們的獅子山精神,不再是力爭上游,薪高糧準。獅子山下,是對抗警暴的勇武抗爭者,是無論天晴或豪雨都堅持上街遊行的和理非。還有為這場抗爭運動奉獻生命的周梓樂、梁凌杰、陳彥霖。 

5. 高中組《Lion's Dawn》

黎明來到要光復這香港~同行兒女為正義時代革命~睇到呢幅畫小妹即可想唱國歌《願榮光》,黎明下的獅子山格外亮眼,仲有呢尊獅子像,身上長著黃色雨傘,散發柔和光芒,兩隻獅子,彷彿是香港的守護神。但願早日重光。

講到守護公義、並肩同行,唔少參賽小朋友都諗起反送中抗爭。但也有小朋友認為香港與中國密不可分。例如高小組這幅用色豐富的《香港人 . 香港心 . 齊心保護我的家》,便畫了一大個熱氣球,上面有著香港區旗,並寫道「愛惜這個家」,熱氣球裡有一名小孩手持香港旗幟與中國國旗。「愛惜這個家」,立馬令人想起去年年末的政府短片口號「珍惜香港,這個家」。

下一代的香港夢裡,有的依舊有中國的位置,但同時抗爭的種子已在他們的夢裡發芽。 

 

高中組《天使的守護》

高中組《天使的守護》

再睇番上年嘅「我的香港夢——感激。敢動」繪畫比賽作品,真係世界變了。「感激。敢動」寓意「真正的感激,必須敢於行動」,其中一副作品仲有呢個非常正氣嘅警察叔叔,手掌上仲畫咗個愛心,依家嘅警察手上只會有警棍同胡椒噴霧吧。當年小朋友畫嘅作品都係講緊幫助弱勢社群,一年過後,他們眼中的世界不再簡單。 

去年作品

去年作品

上屆作品

上屆作品

發表意見