立場新聞 Stand News

【大哥誠讀書報告】《幻愛》

2020/8/18 — 15:49

圖片素材來源:《幻愛》電影劇照、《幻愛》小說封面

圖片素材來源:《幻愛》電影劇照、《幻愛》小說封面

幾十年前賓叔叔仲係叫大哥誠,住喺油麻地讀緊初中一時候,有一晚有一個小學同學仔叫咗我出去食咋喳,然後去咗而家逸東酒店對面嘅一個公園仔度傾計,同學仔讀書好叻,叻過我好多,我除咗中文好過佢同高過佢之外,基本上無嘢及得上佢,而後來身高自中一之後就完全無高過,反而佢有。

同學仔同我一人揸住一支當時唯一唔使按樽嘅珠江橋牌白雲同可樂汽水,有一撘沒一撘喺度傾下啲小朋友話題,傾傾下佢話我知近來成日聽到有人同佢講嘢,但係唔知係邊個,把聲同佢講讀書叻無用,總有人叻過佢,佢第日都係要窮死一世困喺油麻地㗎嘞,我話咁無乜唔好吖,起碼油麻地我哋熟哂又可以竄入去普慶睇早場,去油麻地快樂睇咸濕戲又無人查無人擋,廟街又多嘢食,同學仔話唔係哩,把聲話有人要殺佢呀因為佢太叻會改變世界喎!我一頭霧水問佢咁你即係叻定唔叻呢?佢繼續用咗三十分鐘話我知把聲一時話佢巴閉一時話佢濕滯,我開始覺得唔對路但年紀太細唔知乜事,傾多咗一陣各自返歸瞓覺。

幾個星期之後,其他同學話我知同學仔有精神病入咗青山,之後我哋失去聯絡。嗰次係我第一次接觸精神病患者,當時當然唔識乜乜思覺失調、精神分裂、妄想症呢啲嘢。

廣告

《幻愛》上畫嘅時候好想去睇,因為 A. 女主角好靚好特別,係《短暫的婚姻》裏面個令陳奕迅夢斷魂牽嘅女子。B. 睇劇照拍得屯門好靚好日本,我喺屯門住咗好多年,記憶中屯門好醜樣接近肉酸,好想睇下佢點拍得咁靚咁詩情畫意。結果因為疫情唔係好敢入戲院,無睇到。

然後電影小說出版,又睇書評話比電影更好睇,作為一個 copy base 嘅 Art Director,我深信透過文字應該可以自行 visualize 到番個畫面出嚟,等佢出碟再印証番。誰不知一攞上手完全放唔番低,一口氣全書睇哂,執筆作者蔣䁱薇名字聞所未聞,但文字功力深湛,敘事有條不紊但絲絲入扣,的確能夠透過文字在腦海中幻化成影像,起伏跌宕一氣呵成,書名《幻愛》,其實講嘅係真愛。邊段係幻覺邊段係感覺,如莊周夢蝶平行時空扣人心弦,真假故事穿插,正常的正常還是不正常的正常?細膩筆觸令你對主角嘅精神壓力感同身受,我開始懷疑自己係咪都有精神病所以產生共鳴,對女主角嘅描寫更立體得來令人又同情又想爆粗,但諗番佢咁靚又原諒番佢,係,我承認我對高瘦平嘅靚女寬容度係比較大少少嘅!最後嘅 ending 更加令我釋懷安心合上本書!

廣告

據說小說同電影嘅結局係有分別,等有機會睇埋電影版本再作比較。結論係呢本係我今年睇過最好睇嘅小說!

後記 : 好多年後我喺街上撞番同學仔,佢身光頸靚著 Dolce & Gabbana 西裝,戴 Luminor Marina Daylight 手錶,講嘢正常過我,應該幾好世界,亦應該好番哂!

還是未好番哂先撈得幾好世界?我未好世界亦可能未好番哂,所以無從稽考!

發表意見