立場新聞 Stand News

「幻愛橋」新年燈飾,你真係覺得靚咩?

2021/1/13 — 11:43

日韓影視作品大受歡迎,帶動粉絲到拍攝地點朝聖,例子屢見不鮮。可能因為疫情,香港人難出境,焦點便放回本土。港產片《幻愛》去年票房大收,一度掀起「屯門一日遊」的小熱潮。不少文青情侶不惜騎牛入屯門,走訪一個又一個取景地。其中一個熱點必然是《幻愛》海報的拍攝地點——屯門碼頭海濱長廊。

屯門碼頭海濱長廊本身平平無奇,一如其他區的海濱長廊,沿岸設了些鐵欄。最最特別可能就是有一段直通海中心,走在上面有走入水中的感覺,尤其深夜,這裡還看到星星呢!正因這些特色,電影才決定在這裡取景吧?

難怪,昨日看到區議員甄紹南在 Facebook 宣佈「幻愛橋新年燈飾」時,引起網民熱烈討論。裝置是這樣的:長堤兩旁欄杆裝設米色及粉紅色碎燈至燈塔,長堤上方安裝方形LED燈飾;圓形觀景台擺設桃花樹,樹上及旁邊圓形柱增設紫色及粉紅色LED碎燈。

廣告

喂!唔係呀化?先唔好提,桃花樹搞到好似「生左椰菜花既J」咁。睇圖我以為去咗新城市廣場頂樓咩「空中花園」喎!條橋本身好地地,做乜硬係要裝燈閃下閃下閃,仲要大紅大紫咁好俗氣囉。搞成咁,光害咁大,一定睇唔到星啦。原本寧靜浪漫的氣氛,而家俾你搞彎曬喇!

廣告

審美嘅嘢果然係好主觀。有人話好靚、好fancy,「影婚纱相都得」,勢成「打卡熱點」。最浮誇係同區另一個區議員張錦雄話:「換屆換人之後的區議會,連燈飾都換埋,希望給到大家不一樣的感覺!」地點可能唔一樣嘅,建制派未必睇港產片嘛,但燈飾的 taste 真係無獨有偶。

好在都有人眼睛還是雪亮的,狠批佢「毫無美感,好地地一個電影景點係保護佢,而唔係畫蛇添足。」啱啊!況且,取景地本身已經吸引唔少影迷去朝聖,你再咁搞一搞,唔係影迷純粹打卡的人都湧過去。人山人海,鬥迫,咁好咩?

仲以為送舊就可以迎新,過時過節唔駛再見到啲「核突 Hong Kong style」燈飾,點知⋯⋯唉。無論中意唔中意都好,燈飾工程已經獲得區議會通過,昨日正式動工,預計今個月27號亮燈,為期一個月。

發表意見