2021729

    【周梓樂死因研訊】 死因庭筆記:警員講解如何調查事發現場(問答節錄)

    林志強是負責調查周梓樂案件的偵緝高級警員,今天他在庭上的作供,講述自己到停車場翻看閉路電視、調查現場的情況。
    死因研訊主任葉志康(下稱「葉」)提問警員林志強(下稱「警」)。

    一、關於停車場三樓的調查(節錄)

    葉:你在現場(指停車場三樓)的觀察是?
    警:冇咩特別嘢,如果有可疑,我會影咗相先嘞。
    葉:現場有冇血跡?
    警:有,二樓平台咪有咯。
    葉:咁三樓呢?(提醒正在談論的是三樓)
    警:冇(血跡)。
    葉:矮牆對落係水跡?
    警:相信係嘞。
    ⋯⋯
    葉:水跡份量有幾多?
    警:我冇留意呀。
    葉:以你觀察,你知唔知點解水跡會存在?
    警:知,我有去過現場,停車場洗車好正常。
    葉:你有見到?
    警:當然冇見到嘞。

    *    *    *

    二、關於停車場的總體觀察(節錄)

    葉:你11月4日早上11點左右去到停車場 A,有什麼觀察?
    警:我由斜路上三樓,感覺三樓同二樓差唔多。二樓有平台(指停車位矮牆外有行人路),上三樓就冇嗰個位置。熟嗰就知,唔熟嘅會唔知原來(三樓)冇平台。
    葉:有冇任何令你覺得有可疑嘅地方?
    警:如果有我會第一時間檢取嘞。
    葉:即係有定冇?
    警:冇。

    *    *    *

    三、主動表示調查資料少(節錄)

    葉繼續詢問停車場調查情況,林志強主動提及警方關注案件、而資料不多。
    警:呢單案件我哋警方都好關注,雖然冇咩人匯報。可以話,現場啲人就匯報畀消防,去到醫院又冇人畀資料(畀警方)⋯⋯
    葉:你想表達咩意思?
    警:所有資料都係從傳媒到睇到。剩係知一個後生仔,科技大學,跌咗落來。
    葉:你意思係,當時(11月4日早上11時)警方未有接到正式投訴或者報案?
    警:係。資料好少,可以睇嘅只有現場,現場有灘血,隔離有樓梯,我行過都冇咩。

    *    *    *

    四、為何之前沒提及4支固定鏡頭(節錄)
    葉:(停車場)除咗你講嘅「波波鏡」(林志強用語,指圓形的移動閉路電視鏡頭),仲有冇其他?
    警:有「梗鏡」(固定鏡頭),二樓有兩個,地下有兩個,影住出入口位置。應該4支左右。
    葉:你11:40入停車場閉路電視房,喺房有睇到嗎?
    警:睇唔到。
    葉:你知唔知點解?
    警:而家梗係知嘞。(固定鏡頭)唔係屬於威信(物業公司)停車場。
    葉:當時呢?
    警:(我)同同事提過。當時主要搵返死者身影。

    (林志強警員之後還負責到醫院安排周梓樂屍體送至殮房,讓周父母辨認遺體,到周家檢取周梓樂物件,以及到殮房觀察法醫解剖。)

    (2020年12月14日,周梓樂死因研訊第17天)
     

    編輯推介

      發表意見