立場新聞 Stand News

一分鐘.十年功.黑粉紅

2020/10/21 — 14:00

紀錄片《Blackpink: Light Up the Sky》宣傳圖片

紀錄片《Blackpink: Light Up the Sky》宣傳圖片

外公乃係粵劇工作人員,三不五時會帶豆丁嘅我去戲棚玩同呃糖食,久而久之令童年大哥誠對廣東大戲產生興趣,外婆在家中對住台電視機仔睇《紫釵記》、《牡丹亭驚夢》、《雙仙拜月亭》、《竇娥冤》一大堆戲碼時候我都會陪伴在側問哩問𡀔,特別係睇到《六國大封相》、《關公救嫂》之類武生表演毯子功翻騰踢腿、拿頂下腰拱橋連續後空翻再接後手翻然後落一字馬呢類動作,小朋友當然睇到目瞪口呆大呼犀飛利,呢個時候睿智嘅外婆就會笑笑口同我講:「好睇吓哩,嗱佢由細蚊仔練到大日日重覆苦練,再加埋祖師爺保佑,先得嚟咁巴閉㗎咋,正所謂台上一分鐘,台下十年功咪咁解囉!」 

外婆講嘢永遠有道理,從此一分鐘要靠十年功加運氣呢條方程式令我銘記於心!

睇完 Netflix 韓國女團 documentary 講 Blackpink 嘅《Blackpink: Light Up the Sky》,外婆呢段教誨馬上彈番出嚟,Blackpink 四個女仔靚唔靚?其實真係麻麻地,Lisa 其實有少少醜添,齋睇樣其實四個都細細粒平凡到不得了,同很久很久之前洪武紀時代嘅大師姐李孝利,《成人禮》嘅朴志胤,甚至侏羅紀時代嘅少女時代都差一點點,但四個上咗妝,styling 過換咗衫企上台完完全全判若兩人,壓台感勁過一噸炸藥,MV 製作更加好睇到會令你研究點解可以拍得咁鬼好?當然你可以話因為有錢不惜工本投入去包裝,但睇番佢哋訓練過程,每個人都要放棄一切,十零歲開始接受全天候式嘅 training 三五七年,每兩星期先放一日假,訓練艱苦每星期每個月都會淘汰一啲人,每個月每人都要考核表演,又 solo 又 group performance,唔掂即閃,就算成團之後,一首歌可以錄一千次先收貨,真係諗下都覺得恐怖,抵佢發!

廣告

全片最尾 Jennie 喊住講話咁多年苦練但然後對照番今日,再辛苦都係值得嘅!Lisa 更加由一個完全唔識韓文嘅泰國妹練到可以用韓國話 rap,除咗用死心苦練其實別無他法!全條紀錄片由頭到尾講嘅係毅力,加苦心造詣,當然,加埋有運,先可以同成功拉近關係!

至於點解一條大叔會睇 Blackpink,仲睇埋條成長 documentary,首先大叔鍾意睇後生女係定律嚟嘅,難道鍾意睇一啲都唔美加癡肥嗰個渡邊直美咩?再加上,妖,鬼叫鄭秀文咁耐先出首歌,陳奕迅成日掛住巡迴唔見咗,Adele 又無新歌,盧巧音又直情退休咩?

廣告

唔通叫叔叔睇 XXX 同 YYY 嚒?

發表意見