立場新聞 Stand News

中佬與您 齊齊認識 MIRROR(上)

2021/1/5 — 18:37

圖片來源:MIRROR Facebook

圖片來源:MIRROR Facebook

【文:蘭斯貝利】

呢兩年因為香港狀況,留多咗喺屋企,亦輾轉追哂三輯《全民造星》。

假如《造星 3》係令懷才不遇嘅藝人再出發,睇返頭兩輯,就知道 MIRROR 佢地每個背後都係有血有肉嘅人。最近因為叱咤獎項嘅爭議,部分無咩留意香港樂壇嘅朋友亦有不少意見,大多對 MIRROR 印象只係一隊香港走韓風嘅男團,但佢地十二個其實各有特色,我亦由對佢地無咩感覺,到覺得佢地真係好努力。

廣告

作為一名中佬,我個人鍾意 ERROR 多啲,以下好多睇法未必同佢地粉絲角度相近(例如對樣貌嘅評價),但十二個人,值得俾更多香港人認識係咩一回事。由於一次過寫十二個只會係 TLDR,所以我用上下集以年齡做區分,由成熟穩重最後講到小鮮肉 OK?教主呀姜 B 呀嘅 fans 等下先。

廣告

Frankie:個人認為佢係 MIRROR 入面最靚仔最有男人味嘅一個。但作為年紀最大嘅一位,係會為佢擔心。早前只係見佢喺《男排女將》客串,做鄧麗欣師弟買保險,佢係走型男路線,做模特兒同跳舞絕對無問題,但唱功真係麻麻,如果無返咁上下,好難繼續立足,同埋如果再有多啲個性呈現俾更多人睇就好啦。

Lokman:八十後三子之二,當年《全民造星》第三名,亦係 MIRROR 團隊隊長,好多人因為《狂舞派》而認識佢,但我欣賞佢嘅唔止舞技,因為我認為 MIRROR 團隊應該好開心有佢做隊長,從節目中同談吐中都睇到佢嘅穩重同責任感,而且願意為團隊成就隊友照顧隊友,呢樣係好值得大家尊重,近年嘅確係睇到 Viu 將資源投放俾識唱歌嘅團隊成員,但都要俾多啲機會隊長發揮呀!以佢轉數同創作諗頭(好鍾意佢《全民 2》嗰首《隨意門》),做舞台劇絕對係佢發揮嘅空間!

Alton:同樣八十後,名言為「肌肉就是力量」。《造星 2》時出現實力排行榜,當時被認為實力不足嘅一位包尾收場,但佢對舞台嘅執著熱誠,以及表情多多,後來對佢另眼相看。最令我驚喜嘅係佢《男排女將》嘅演出,完全將漫畫山口忠嘅角色演活,成為關鍵發球能手,而佢亦都印證咗,每個被忽視嘅團隊成員,總會有佢光芒大發嘅時刻。希望可以繼續喺 Viu 劇集見多啲你!

Stanley:舞蹈員出身嘅佢,身高 183 cm 全隊最高,自然係吸睛嘅一位。加上佢外貌不俗,當年參加《造星 1》時已被譽為大熱人馬之一,但後來比賽期間因為評判一句「只留意到佢嘅胸肌」令 Stanley 一度懷疑自己嘅實力。不過天生有喜感嘅佢,演藝天分係 MIRROR 入面數一數二,無論正經或者搞笑都駕馭到,自然參與 Viu 劇集機會不少,而令我驚喜嘅係佢喺《地產仔》鹿仔嘅角色,為咗得到大媽們買海外樓而大跳特跳,咁講起佢其實係跳舞群組嘅始祖(笑)!2021 年佢會有套同台灣嘅合拍劇《塵沙惑》推出,各位不妨留意下佢嘅演出!不知不覺來到而立之年嘅佢,唔知幾時同《造星 3》十強人馬嘅女朋友 Alina 拉埋天窗?

Anson Kong:最近都多咗人談論佢,但唔係因為佢嘅歌,而係叱咤未能拎到任何獎而被人覺得佢黑隊友面。雖然佢事後解釋嗰句「等了 28 年終於到今日」真係黑人問號,未出世就想拎新人獎?不過如果有留意開 AK,你會知道佢係一個好認真同埋對自己有要求嘅人,對賽果失望流露真性情亦都明白。畢竟喺 MIRROR 入面,又識跳舞又有一定唱功仲要靚仔嘅唔係咁多個,但佢都算係成員入面較全面嘅一位。AK 係團隊嘅副隊長,如果隊長 Lokman 係走懷柔政策,咁佢一定係行鞭策路線,性格上亦都係非常有火,從《造星 2》入面 MIRROR 實力排行榜而直接同花姐對質可見。今年佢都出咗四首歌,主要都係抒情歌為主,希望在歌曲中都可以呈現到你嘅另一面!《蝸牛》同《特登》都值得一聽!

Jer:之前介紹個好多位團隊成員都係有跳舞底子,但佢係不折不扣嘅一位歌手,仲係唱廣東歌。街頭演唱出身,曾擔任娛樂記者嘅佢,毅然辭職參加《造星 1》。本來 50 強時因為外貌外形不出眾而慘被淘汰,但最後導師團挽留,直到 20 強止步。不過有能力嘅人自然有人欣賞,佢輾轉成為 MIRROR 成員。平心而論,作為偶像組合,佢一直被質疑,但《造星 2》音樂演出令觀眾開始留意及欣賞,包括我。

向來唱功於 MIRROR 超班嘅佢,2020 年同其他團隊成員一齊單飛出歌,眼見競爭對手係教主 Anson Lo 同多面 Anson Kong,彷似因而比下去嘅時候,Jer 交出咗令樂迷驚艷嘅物語系列:由王雙駿同小克聯手打造一個截然不同而且有味道嘅柳應廷。比起兩位 Anson 嘅大路情歌風格,物語系列想帶出嘅訊息更為深思同沉重得多 — 死亡。

作為新人,佢大可以揀大路 K 歌,但《水刑》、《迴光》、《風靈》三首物語歌唔係一般情歌,成個系列由大海出發到宇宙浮沉最後幻化成風,一氣呵成,同林家謙嘅歌一樣:辨識度高,襟聽。《迴光物語》能夠以新人姿態取得冠軍歌,唔係個個都做到。由一開始《造星》時嘅缺乏自信,到用三首歌建立佢嘅歌曲風格甚至建構整個世界觀,Jer 取得新人金獎絕對實至名歸。

希望大家可以好好記住 Jer 柳應廷。

「我地加油,希望更多人聽返廣東歌。」阿 Jer 如是說。你已經做到了。繼續加油!

 

作者自我簡介:本地足球專頁足字室室主,除了足球,熱愛本土歌影視文化

發表意見