立場新聞 Stand News

也談「劣根」和「劣根性」

2020/4/4 — 12:52

近日,哲人王偉雄寫咗篇文,大談《何謂劣根性》,強調「劣根性」一詞應該係指「劣〜根性」,而唔係「劣根〜性」,不過睇來睇去,篇文似乎都未講清楚「根性」係乜東東。更重要嘅係,龍、袁二人當日篇文,所用嘅其實係「劣根」,而「劣根」係另一個佛教用語,意思同「鈍根」同義。

喺佛法當中,「根」有兩種意思,一係指人類嘅感觀能力,如「六根」,就係指「眼、耳、鼻、舌、身、意」;另一種意思,則係講一個人有無修成佛法嘅根本能力,如「五根」,就係指「信根、勤根、定根、念根、慧根」。

「劣根」個「根」,就係「根」喺佛法中嘅第二種意思,指對方修成佛法嘅根本能力差,例如:慧根不足,定力唔夠…而唔係話佢天生或遺傳上有乜嘢缺陷,亦唔係對方生性邪惡,因為佛家相信「芸芸眾生,皆有佛性」,只係對方想修成正果會比較困難,但係只要持之以恆,最終亦會生成正果。

廣告

至於哲人王偉雄提到嘅「根性」,則係指一個人嘅「根」同「性」。「根」如上所述,係修成佛法嘅根本能力;「性」則係指出生以來所積聚落來嘅慣性。假如一個人嘅「根」、「性」皆好,自然較易修成佛法,反而則較難。

當然,本人相信龍、袁二人喺文中提到嘅「劣根」,應該唔係用緊佛法當中嘅本義,因為佛法相信,芸芸眾生當中,個個根器不同,又點會認為某一國籍嘅人,全部人都有劣根呢?因此,二人所講嘅「劣根」,應該係指已經喺中國植根良久嘅劣質文化風俗。

廣告

值得質疑嘅係,食野味呢一種飲食習慣同文化,係咪只係中國人獨有嘅先?成個中國十幾億人,又有幾多人真係鍾意食野味先?既然世界各地都食野味嘅風俗,乃至食野味嘅中國人唔係多數,將「食野味」講成係「中國人陋習劣根」,又算唔算 stereotyping 先?

當然,更更更重要嘅係,龍、袁究竟有乜嘢科學證據,證明新冠肺炎嘅零號病人,真係因為食野味而染病嘅先?佢地又憑乜斷定病毒唔係實驗室洩漏出來嘅先?佢地兩個雖然強調自己係科學家,但係睇完成篇文,就真係睇唔到所謂嘅「中國人陋習劣根」,點樣係「病毒之源」囉?

發表意見