立場新聞 Stand News

佐治仔的故事

2019/12/20 — 17:45

資料圖片,來源:LJ @ Pexels

資料圖片,來源:LJ @ Pexels

溫故知新,準備等睇第九集!

A long time ago in a Galaxy far, far away ...!

60 年代,一條茂利喺南加州電影學院讀書,睇埋睇埋好多電影,包括亞洲電影作參考之用,其中一齣日本武士片唔覺意咁深深植根咗喺條加州茂利腦海之中。呢齣電影嘅故事其實好鬼簡單,兩件戰國時代又唔靚仔又唔好打又肥又矮又瘦又貪生又怕死嘅死廢柴 underdog ,喺一個大英雄武士強者威迫利誘之下,護送一位落難公主回國復位,成齣電影特別之處係喺嗰個英雄當道嘅年代,故事主角居然唔係英雄,而係嗰兩件死廢柴!

廣告

加州茂利讀完書喺荷李活打拼,憑藉才華運氣拍咗兩齣電影,第二齣非常收得,於是有自主權開第三齣戲,佢始終對讀書時睇過嗰齣日本武士電影念念不忘迴響不絕,但又心思思想拍齣科幻電影,而又再心思思想拍齣史詩式傳世巨著喎,可能有一次食完 Kinder 出奇蛋之後忽發奇想,阿加州茂利決定將三個艾啲牙 s 炒埋一碟,寫左個劇本叫《The Journal of the Whills》,但可能佢見個戲名唔夠氣勢所以佢改完又改,改完內容又改戲名,改完戲名又再改內容,最後,佢決定個戲名用簡短而又氣勢磅礴鏗鏘有力嘅三個簡單易明英文字嚟到表達……

The Star Wars !!!!

廣告

嗰齣日本武士電影叫《武士勤王記》,1958 年黑澤明導演!

嗰個大英雄武士係三船敏郎,兩條死廢柴 underdog 角色之後演變成 C-3PO 同 R2-D2。

嗰條加州茂利當然係 George Lucas 佐治魯卡斯!

After that, it's History !!!

但故事未完!

65 年至 70 年間,黑澤明連續幾齣戲唔收得更被同業、觀眾批評與時代脫節江郎才盡,意志消沉自殺又唔死得,正在唔知點生唔知點死之際,憑《星球大戰》顯赫一時如日方中嘅阿加州茂利佐治仔在遠方得悉有見及此,諗番起自己現在擁有嘅財富地位其實幾乎真係多得黑澤明當年嘅遙遠啟蒙及影響唔少,既係 Muse 亦係 mentor,於是二話不說感恩圖報拍心口上,拉埋另一位老友法蘭仔,呢條姓哥普拉嘅老友剛啱拍完一齣意大利古惑仔戲同一齣起勢爆炸起勢死人個個角色無個正常兼夾抑鬱嘅嘈冤巴閉戰爭電影,一齣叫《教父》一齣叫《現代啟示錄》,又係當時得令巴之閉到不得了。兩個老友四出籌集資金,幫助黑澤明拍成《影武者》,影片大受歡迎起勢咁獲獎,曾經一蹶不振嘅谷底黑澤明重上人生高峰成為日本電影界「黑澤天皇」!

黑澤明當日就算點聰明絕頂目光如炬,應該都無可能諗到佢拍嘅《武士勤王記》會影響到幾千幾萬公里外嘅一條白人死𡃁仔再間接令呢條死𡃁仔名成利就如日中天發足幾十年,更唔會諗到當佢自己最唔掂嘅時候一手幫佢重新威振八方嘅竟然會係當日呢條𡃁仔!同樣,佐治仔未成為人人敬仰拜服嘅魯卡斯先生之前,亦唔會諗過當日細時睇嘅其中一齣電影會改寫佢一生事業甚至最後有能力扶那位精神上嘅師傅一把,令佢在皇者地位中走完此生!

昨天在太平街某咖啡店睇到呢一張陳年海報,喚起本人寫一段充滿共時性嘅奇妙因果故事!

作者提供圖片

作者提供圖片

發表意見