立場新聞 Stand News

吳孟達係喜劇教科書

2021/2/27 — 22:10

圖片素材來源:電影《破壞之王》、《逃學威龍2》、《賭聖》截圖

圖片素材來源:電影《破壞之王》、《逃學威龍2》、《賭聖》截圖

好多人以為喜劇只係出嚟搞下笑,其實演喜劇好多時比演其他戲更難,背後有更多學問,並唔係胡亂咁「無厘頭」就可以做到……

下圖出自《逃學威龍》,吳孟達所飾演嘅達叔,威脅會燒晒大飛嗰箱錢,但係佢淋完火水之後先發現自己同周星星都冇火機,千鈞一髮+無可奈何之下達叔竟然問大飛借火!呢一個笑位,並唔係普通嘅「無厘頭」,係將達叔呢個小人物嘅 stupidity 推到極致下做出荒謬行為嘅喜劇效果。

廣告

達叔喺喜劇/戲劇嘅造詣同修為係極高,尤其點樣演好一個喜劇配角。讀戲劇嘅人一定知道,要演好一個配角,好多時比演好一個主角更難。達叔今天走了,我突然驚覺,即使達叔好多作品都為人津津樂道,但係要我選一個我最喜歡嘅吳孟達角色,係好難揀!呢個可能就係最佳男配角嘅最高境界!

吳孟達嘅演出本身就係一本喜劇嘅教科書!

廣告

周星馳+吳孟達喺華人戲劇史上,係五十年一遇、甚至一百年一遇嘅黃金拍檔。就好似「籃球之神」米高佐敦身邊,都要有「天下第二人」柏賓輔助,先會有呢一個天下無敵嘅組合……

如果冇吳孟達,就冇「喜劇之王」周星馳!

達叔,感謝你曾經帶俾我哋無限歡笑!一路好走!

後記:

大家對吳孟達嘅離世,評價不一。有人懷緬佢嘅演技,亦有人非議佢近年作為中共護旗手嘅言論......

歷史評價就係咁,有啲人物嘅評價會比較鮮明,亦有啲人物會好壞參半丶較具爭議性。所以,對於具爭議性嘅人物無必要尋求一個統一說法。秦始皇功大於過還是過大於功,到今日都係冇定論,「具爭議性」本身就係後世對秦始皇嘅評價。而罪大如秦檜,後世仍然會稱讚佢嘅書法造詣同成就。一個人嘅功過是非,當代及後世嘅人都會有唔同說法,加埋就係歷史公論。

要讚要彈,各人自有其選擇,不必強求他人。

吳孟達護旗,我都好反感;但係,佢喺演藝事業嘅成就,以及佢曾經帶嚟嘅歡笑,依然值得我追思。

(文本無題,現題為編輯所擬)

發表意見