【奇文共欣賞】從「不僅單單是」看透一個文學界候選人嘅水平

是咁的。

藝發局選舉月尾就投票，各個候選人四出拉票。我雖然有票在手，但又唔你出名，當然無候選人主動關注啦。但作為一個負責任嘅選民，我係會自己上網搵資料，研究吓啲候選人嘅背景，先再去投票嘅。

藝發局選舉個網已經更新咗，十個範疇，無論自動當選定要等投票，所有候選人嘅背景資料同政綱都齊曬，任睇！

睇到文學範疇，我真係笑到有腹肌。陳慧個對手吳永彤，三百字唔夠嘅政綱，睇到人眼都突埋。先利申，我唔係揸筆搵食，我中文好差，但呢位吳大師嘅中文，實在，第一句已經出事：

「一個城市的發展和歷史的久遠，不僅單單是經濟的發展，同時更重要的是需要文化的包裝，打出恒遠的超人品牌，才能讓人心記得，歷史記得。」

「不僅」，即係「唔止」嘅意思啦；但又加「單單」，即係「只係」嘅意思喎，咁究竟係「唔止」定「只」先？媽啊～我好亂呀！

再嚟：

「...本人今次的參選，就是為了挽回東方這顆明珠，再讓其發光發熱...」

一直以來我聽「挽回」通常都係連埋信心一齊講，「挽回明珠」work 唔 work 呢？我就唔肯定啦，可能係我孤陋寡聞嘅～

「...讓本土和南來作家融合一起，為香港文化和中華文化發揚光大，為東方明珠再度輝煌。」

最後一句繼續嘔心瀝血嘅 style。「讓本土和南來作家融合一起」 suppose 係連住「融合一起」可以發揮到咩作用，之但係佢用咗「為」。「為」即係「為咗」乜乜乜嘅意思啦，文末先嚟「為咗」乜乜乜，其實你係咪未寫完㗎？

至於其他大大小小嘅經典內容，大家自己睇啦，不如考慮吓俾小朋友當補充練習，應該學到唔少嘢㗎～

全文貼係度，歡迎句構撚多多指教：

一個城市的發展和歷史的久遠，不僅單單是經濟的發展，同時更重要的是需要文化的包裝，打出恒遠的超人品牌，才能讓人心記得，歷史記得。香港作為東方的明珠，在經濟上一直佔有優勢，但由於國內及外圍城市的崛起，以及香港對文化包裝的不夠重視，或文人相輕，太小圈子化，尤其本土學院派歧視南來作家，令香港文化資源分配不公，文化資源撑控在幾個人的手中，慢慢令香港文化黯然失色，東方明珠的聲譽也隨之淡然。本人今次的參選，就是為了挽回東方這顆明珠，再讓其發光發熱，打破一切小圈子，文人相輕的風氣，把文化資源公平公正的分配，讓本土和南來作家融合一起，為香港文化和中華文化發揚光大，為東方明珠再度輝煌。